Бала анасы уьшин бу яшавда – энъ де маьнели эм баалы инсан. Аьелде кеде тувса, анасына, аьели- не коршалавшы болады. Болса да, аьр бир ана анълайды, «Эр киси эли уьшин тувады» деп халкымызда босына айтылмайды. Элди саклав эм коршалав – увыллардынъ бас борышы. Фаризат Нурлубаева аьвлетлерин ялгыз оьстирди, эри яшавдан айлак эрте кешип кетти. Кашан да, янында кардаштувганлары бар эди, тек юрегиндеги дертин коьзяслар ман шыгарып, Фаризат айтатаган эди: «кыйынлыклар да оьтер». Суьйиниш кайгыдан артатаган эди, Динара эм Артур анасын ийги окув ман, уьстинликлер мен кувандырган. Атай ман тетейге де уныклар яшавда куьез эди, Джамалуддинди эске салып, юреклерин юмсайтатаган эдилер.
Артур Джамалуддин увылы Нурлубаев Червленные Буруны авылында тувган, мунда мектебке барды, сонъында Нефтекумск каласында региональли политехнический колледжди де битирди.
Артур «электромонтер» кесписи мен бирге коьлик айдавшы шайытламасын да алды. 2025-нши
йылдынъ карагыс айында Артур Нурлубаев Буденновск каласына эр борышын толтырмага кетеди.
Аьлиги заманда, ястынъ яшавына караганда, ойлайсынъ, шоьлде оьскен кеделердинъ бириси.
Алдына мыратлар салатаган эди – анасына, аьптесине тирев боларман, окувымды бардырарман, аьел курарман. Оькинишке, мыратлар толмады. Артур куллык этетаган боьлик Крым ерине коьшириледи, согыс спецоперациясы оьтип турган япсарларга. 2026-ншы йылдынъ сары тамбыз айынынъ 14-нши куьнинде Артур оьз эрки мен аьскершилерди туратаган ерине аькетейим деп шыгады. Коьликте 20 аьскерши болган, Артур айдавшы эди. Беспилотниклерди коьрген яс олардан кашпага баьри амалды да алады, тек доьртиншиси буларга етеди. Сол заман Артур, йолдасларын куткарайым деп, отты оьзине алады. Артурдан оьзгелер аман каладылар.
– Меним увылым оьз яшавын курманлык этип, йолдасларын куткарган. Мен ойлайман, Артур
олардынъ эслеринде сакланар, – дейди коьзясларын тоьгип, Фаризат.
Мен Артурды бала заманында коьргенмен, сол куьн ювы- кларымыз арасында эки ашшы йойым болды. Кашан да, кайтип авырмасын юреклеримиз. Артурдынъ акында эс кайбиримиздинъ
янларында сакланар дайымларга. Баьтирлер бизим эскеруьвлеримизде, эткен ислеримизде кала-дылар, олар – бизим бийик тоьрешилеримиз. Артур Нурлубаев тувган Червленные Буруны авылында койылган. Баьримизге де ол – баьтир, оьз яс янын аямай, янындагы йолдасларын куткарган. Артур Йигитлик ордени мен (оьлгеннен сонъ) савгаланган.
Артур атларды куьшли суьетаган эди. Кемалуддин-акасы оны эсине алады, ызгы соьйлевинде
ол Тулпар атына кайтып келип, тувган буйратлары ман шаппага суьетаган болганын айткан. Артур
Нурлубаев Терекли-Мектеб - Дербент атлар барувында катнаскан болган.
Ногайлар айтадылар: «Заман келсе, карт оьлер, аьжел келсе, яс оьлер». Келеекте бизге де, элимизге де коьтергишлев эм тирев болаяк ясларымыз оьлип кетсе, юрек коьзяслар ман, кан ман йылайды.
Г.Бекмуратова.
Суьвретте: А.Нурлубаев.