СВО катнасувшысы
Автор Анварбек Култаев
Яикбаевлердинъ тукымы республикамыздынъ Бабаюрт районы еринде ийги белгили.Тукым басы Магомед Яикбаев акында Тамаза-Тоьбе авыл яшавшылары аьлиге дейим де оьзлерининъ йылы соьзлерин оьктемсип айтадылар. Магомед аьели Дженнет Абдулзагир кызы ман 4 увылын оьстирип яшавдынъ кенъ йолына салган.
Биз буьгуьн соьзимизди Магомед увылы Эльнурдин акында бардырмага токтастык. Эльнур россия аьскерлери юритип турган айырым согыс спецоперациясында белсен кепте катнасып, оьзин ийги ягыннан коьрсетеди. Бу куьнлерде йигит ясымыз оьзининъ тувган Тамазатоьбе авылында, анасынынъ янында. Себеби – атасы топырак болып, анасы карт тетейининъ касында турады. Ога ийги карав этеди. Эльнур болса, анасы ман тетейине куьн сайын колларыннан келген коьмегин этеди.
Эльнур Магомед увылы акында не зат айтпага боламыз? Ясымыз 1996-ншы йыл 23-нши сентябрь куьн Тамазатоьбе авылында тувган. 2014-нши йыл Тамазатоьбедеги орта билимлендируьв мектебти битирген. Муннан сонъ ол аьскер генералы Маргелов атындагы эки кере Кызыл байраклы согыс-десантлык А.Суворов атындагы Рязань гвардия йогары командалык училищесининъ орта профессионаллык билим беретаган факультетине туьскен. Арасы уьш йыл оьтип, 2017-нши йыл РГВВДКУ-ды прапорщик аьскерлик дережесин алувы ман битирген. 2017-2018-нши йыллар ишинде Свердлов областинде службасын бардырган. Онда ол ракета бригадасында ракета дивизионын канагатлавдынъ взвод командири болып турган. 2018-нши йыл Эльнур Благовещенск каласындагы Жуков орденли Дальневосточный йогары ортак аьскерлик команда училищесине туьскен. Училищеде окыган заманында аьскершилик кол ман куьрес бойынша эм согыс доьртяклы куьрес бойынша спорт мастерининъ кандидат нормасын толтырган.
2021-нши йыл ДВОКУ-ды лейтенат офицер дережесин алувы ман битиреди эм оны Хабаровский крайдагы мотострелковый бригадага мотострелковый взводынынъ командири этип йибередилер.
Айтып озайык, 2022-нши йыл март айыннан алып, июнь айына дейим Эльнур Яикбаев гранатомет взводынынъ командири эсабында ЛНР, ДНР эм Украина еринде юритилетаган айырым согыс спецоперациясында ортакшылык этеди. 2023-нши йыл июнь айында кезекли тамада (старший) лейтенант аьскерлик дережесининъ аьпелеклери ийинлерине тагылады. Муннан сонъ ол 2023-нши йылдынъ август айыннан алып мине куьнлерге дейим тагы да СВО-да катнасады эм батальон командирининъ коьмекшиси болады.
Айырым согыс спецоперация барысында коьрсеткен эрлиги эм йигитлиги уьшин ол «За отвагу», «СВО-да ортакшылык эткени уьшин» эм «Согыс байланысын беркитуьв уьшин» деген медальлери мен савгаланган.
Айтып озайык, Эльнур Магомед улы Яикбаев Москва каласындагы Фрунзе атындагы ортак аьскерлик академиясында усталыгын оьстируьв бойынша курсларын да битирген.
Эльнурдынъ агасы Гамид Магомед увылы – лейтенант, ВДВ полкынынъ бронетанк службасынынъ офицери. Инилери Рахман эм Рахим эгизлер боладылар. Рахман да лейтенант, ол Рязаньнинъ гвардия йогары ава-десантлык командалык училищесин битирип, СВО зонасында аьрекетин бардырады. Рахим – ол киши лейтенант. Аьлиги заманда Рязань каласындагы радиотехникалык университетининъ 2-нши курсынынъ студенти. Ол да аьскер службасын уьстинликли кепте оьткен йигит.
Коьплеген йылы соьзлерди Эльнурдынъ атасы эм анасы акында да айтпага болаякпыз. Олай демек, атасы Магомед Бийсолтан увылы асылы ман Тамазатоьбе авылдан болады. Дондагы Ростов каласында авыл хозяйство продукциясын аьзирлев бойынша техникумын окып битирген. Оьз авылында фермерлик хозяйствосы ман каьрлеген эм уьйкен сый казанган. Тек не пайда, каты авырувдан сонъ быйыл дуныядан тайган. Анасы Дженнет Абдулзагир кызы да сосы авылдан. Хасавюрт каласындагы авыл хозяйство техникумын битип, бухгалтер кесписин сайлаган. Аьлиги заманда Тамазатоьбе орта мектебинде бухгалтер болып ислейди.
Булай алып караганда, Яикбаевлердинъ аьели Бабаюрт еринде ийги белгили эм уьйкен сый ман пайдаланады, олардынъ увыллары оьзлерин тек ийги якларыннан коьрсетедилер. Солардынъ бириси Эльнур-ясымыз болады. Биз де бу йигит уланымыз оьзининъ согыс йолдаслары ман бирге баьри кыйынлыкларды да оьтип, аман-эсен уьйлерине енъуьв мен кайтарлар деп сенемиз.
А.Култаев.
Суьвретте: Эльнурдин Яикбаев.
