Терекли-Мектеб авылындагы орталык стадионында СВО барысында янын берген аьскерши Кайтарбий Елманбетовтынъ эстелигине йыл сайын озгарылатаган 3-нши район волейбол турнири оьтти. Турнир алдында ол окыган Кадрия атындагы мектебинде линейка озды. Мунда организациялар етекшилери, окытувшылар, окувшылар, Кайтарбий Елманбетовтынъ кардаш-ювыклары катнастылар. Шарады окувшылар Низам Якубов эм Милана Абдулмусаурова юриттилер.
Россия байрагын коьтермеге ыхтыяр Ногай район Согыс эм ис, Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиевке эм район етекшисининъ орынбасары Мурат Шадиевке берилди. Энъ де бас деп йыйылганларды мектеб етекшиси Альфия Акимова хошлады.
Оннан сонъ шыгып соьйлеген Акманбет Сангишиев ясларды уьйкен йолдасларыннан коьрим алмага шакырды.
– Бу турнир тек базласлар болып калмай, Элин йигитлерше коршалаган ердесимизге оьрмет этуьв болады. Сондай йолдасларынъыздан коьрим алынъыз. Биз, енъуьвшилердинъ асабалары, совет халкы фашист Германиясын енъгенли 80-йыл толувын белгилеек уьстимиздеги йылда, СВО катнасувшы ердеслеримизге аман-эсен тувган юртларына кайтып, Россиядынъ аьскер данъкынынъ календарине аьли де бир уллы куьнди киргизбеге йораймыз, – деди ол оьз соьзинде.
Оннан сонъ Ногай район аькимбасынынъ орынбасары Мурат Шадиев, билимлендируьв боьлик етекшиси Амирхан Межитов, билимлендируьв куллыкшылар профсоюзынынъ район комитетининъ председатели Арслан Бакиев, «Яслык» яслар орталыгынынъ етекшиси Абибулла Шамбилов, Кайтарбийдинъ абалары Кайтархан Отегенова, Насипхан Баякаева, СВО барысында ян берген аьскершидинъ анасы Кунсулув Аджигайтканова шыгып соьйледилер. Бу куьнги шарада коьзясларды тоьктирген бек коьп йылы соьзлер айтылды, Насипхан Баякаева синълиси Альмира Баякаевага, увылын йойган авыр биринши куьнлериннен алып тирев болган Кадрия атындагы мектебининъ ис коллективине юрегиннен шыккан разылык соьзлерин айтты.
Кайтарбий Елманбетов 1999-ншы йылдынъ 14-нши июнинде Терекли-Мектеб авылында тувган. Кадрия атындагы мектебинде окыган йылларда ол спорт пан каьр шеккен. Яс туьрли базласларда катнаскан, ол коьп кайта тайский бокс бойынша Дагестан чемпионы, 2015-нши йылда Шешен Республикасынынъ чемпионы, СКФО-дынъ 2 кайта чемпионы, юниорлар сырасында Россия чемпионы, спорттынъ бу кебинде спорт мастери болган. Кайтарбий Санкт-Петербург каласындагы Михайловский артиллерия академиясында окыган, сол заманларда онынъ анасы Альмира Баякаева академия етекшилевиннен увылына ийги тербия бергени уьшин разылык хатлар алган.
2022-нши йылдынъ 24-нши февралинде Кайтарбий Елманбетов РФ Савытлы куьшлери сырасында Украинады демилитаризациялав эм денацификациялав бойынша операциясында катнасып баслайды. Сол йылдынъ 16-ншы мартында Харковь областининъ Петровка авылында Кайтарбий Агали увылынынъ яшавы уьзиледи.
Юрекке бек авыр эм ашшы. Ийгилердинъ ийгиси, яшавы янъы басланып турган шакта, кетти. Онынъ кардаш-тувганларынынъ юреклерин бир соьзлер мен де рахатландырып болмайсынъ. Тек йойымнынъ авырлыгын бир кишкей енъил этеди бизим эс, йигит оьз яшавын босына бермеген дегенди анълав. Кайтарбий баскалардынъ яшавы уьшин, бизим ерде тынышлык уьшин оьзиндикин аямаган. Биз онынъ акында эсти саклав керекпиз.
Базласларда окувшылар сырасыннан 5 команда ортакшылык этти: Терекли-Мектеб авылынынъ Кадрия эм А-Х.Джанибеков атындагы мектеблери, солай ок Нариман, Куьнбатар, Червленные-Буруны авыллар мектеблери. Солай ок Нариман эм Кадрия атындагы мектеблерининъ окытувшыларыннан туьзилген эки команда да катнасты. Окытувшылар сырасында Кадрия атындагы мектеби енъуьвши болды. Окувшылар командаларыннан 1-нши орынды – Нариман авыл мектеби, 2-нши орынды – Куьнбатар авыл мектеби, 3-нши орынды – А — Х.Джанибеков атындагы мектеби тийисли болдылар.
Бу куьн биз тагы да, баьтир кимик янын берген, явды коркынышсыз соккан ердесимизди эсимизге аламыз. Ол ясларга йигитликтинъ, элин суьювдинъ уьлгиси болады. Биз оны дайым эсимизде эм юреклеримизде саклармыз.
Нурият Кожаева.
Суьвретте: линейкадан коьринис.