Янъыларда Москвада РФ Шет эллер ислерининъ министри Сергей Лавров пан Дагестан Аькимбасы Сергей Меликов йолыгыстылар. Онынъ барысында Сергей Лавров Дагестан етекшисине РФ-нынъ Шет эллер ислери министерствосынынъ «За вклад в международное сотрудничество» деген коькирек белгисин тапшырды.
Сондай савгага республика етекшиси регионнынъ шет эллер партнерлары ман савда-экономикалык эм маданиятгуманитарлык байланысларды беркитуьвде заьлимдей уьстинликлерге етискени уьшин тийисли этилинген.
– Биз сизди бизи мен етимисли аьрекет этетаганынъыз уьшин Россиядынъ Шет эллер ислери министерствосынынъ савгасы ман белгилемеге суьемиз. Ол сизинъ бай коллекциянъызды толыстыраягына сенемен. Бизге сиз бен биргелесте аьрекетлев янга якын, – деп белгиледи министр. Сергей Меликов федераллык ведомство етекшисине Дагестан Республикасына эс каратканы эм оны колтыклаганы уьшин оьз разылыгын билдирди.
ДР Аькимбасы Сергей Меликовка шатлыклы аьлде сондай йогары савга тапшырылган ман байланыста Дагестан парламентининъ спикери Заур Аскендеров оьз ойы ман боьлисти.
– Ызгы йылларда, соьзсиз де, Дагестан Республикасы халклар ара байланысларынынъ берк оьрленуьвин коьрсетеди. Дуныялык рыногында ол кенъ белгили. Коьп яклы байланыслардынъ оьрленуьви онлаган дуныя эллерин инвестициялар киритуьв уьшин, яратувшылык коллективлер, илми тоьгереклери, спорт, билимлендируьв эмтуризм ваькиллерин кызыксындырады, – деди ол.