Аьр бир миллет оьз алдына баска эм соны ман ол аьлемет те болады. Оьз халкым – Ногайым, тоьгерек юзли, коьзим кысык… Сол кебим тувыл ма аьлемет. Яшайтаган ерим –
Караногай, шоьллигимде кенъ яйылган авлагым, ким суьймейди мен яшайтаган ерлерде язлык шагында болмага, ярасык боьригоьзлер арасында суьвретке туьспеге?! Тав
якларда яшайтаган аьдемлерден биз коьп затымыз бан баскаланамыз…
Булай карасак бир йолыгыслар уьйкен оьзгерислерге айланадылар, аьдемлер араларында дослык тувады. Дагестан – коьпмиллетли республика, мунда яшайтаган аьдемлер туьрли тиллерде соьйлейдилер, аьдетлер аркалы яшав барады, солар баьриси де ортак Аталыкка суьйим сезимлерин тувдырадылар…
Бу куьнлерде сондай майданлардынъ бириси И.Ханбалаев атындагы республикалык билимлендируьв орталыгы болды, мунда «Миллетлер коьп, Эл бирев» деп аталган форум болып озды. Сол куьн «Ийги соьз янды уянтады», «Уллы Аталык согысынынъ асабалары» деген яратувшылык шарасынынъ эм «Коьпмиллетли Дагестан» деп аталган этнографиялык суьвретлер конкурсынынъ енъуьвшилерин савгалавы да оьтти.
Бу куьн мунда «тири» соьз, эс эм тувган ерге суьйим уьшин савгалар берилдилер.
– Россия элининъ ярасыклыгы
– туьрли миллетли халкларда, олардынъ баскалыгында. Аьр бир миллет оьз алдына аьлемет эм олардынъ маданияты да бек кызыклы, олар ортак маданиятты туьзедилер, солар ман биз оьктемсиймиз. Биз туьрли миллетли халклардынъ аьдетйорыкларын, тиллерин сакламага, тарихин эсте тургызбага тек борышлы болып калмаймыз, биз соларды оьзимизден сонъ келееклерге калдырмага керекпиз, – деп баслады оьз соьзин орталык етекшиси Анжела Байрамбекова.
Форумда катнаскан сыйлы конаклар: РФ Государстволык Думасынынъ комитетининъ председателининъ биринши орынбасары Артем Бичаев, Тахо-Годи атындагы педагогикалык илми-актарув институтынынъ директоры Альбина Арухова «Ягуар» ОМОН, следственный комитетининъ ваькиллери, сервис эм машиностроение колледжининъ директоры Людмила Шабанова форумга сыйлы белги бердилер.
Мунда буьгуьн бек аьлемет кызыклы эди: этнографиялык суьвретлер выставкасы, аьр бир суьврет бир тарих акында хабарлайды, миллетлер кийимлерининъ выставкасы
– яшав кимик, яркын эди…
Солай ок мундагы конакларда бу куьн миллет асларыннан татпага да мырсат болды, оьз колы ман дагестанлы савыт-савран ясамага да, туьрли мастер-классларда катнаспага да кашан да амал бар эди…
«Миллетлер коьп, Эл бирев» форумы тагы да бир ыспатлайды: Бизим куьшимиз – бирликте, сыйлавда эм ортак эсте. Бу кышкырыклап айтылган соьзлер тувыл, юрек
пен сезилген терен ойлар…
Сол форумда бизим ердеслеримиз де ортакшылык эттилер эм аьр бир туьрли номинация бойынша савгалы орынларга тийисли болып кайттылар.
Айтып озайым, А-Х.Джанибеков атындагы орта мектебининъ баслангыш классларынынъ окытувшысы Гульнара Хозбулатова «Уллы Аталык согысынынъ асабалары»
номинациясында биринши орынга, а Червленные-Буруны авылынынъ З.Акмурзаев атындагы мектебининъ окытувшысы Гульмира Гапарова эм этнографиялык сувретлер конкурсында Балалар яратувшылык уьйининъ окытувшысы Салима Хасбулатова енъуьвши болдылар. Форумда катнаскан окытувшылар толы коьнъил мен, ис аьрекетин тагы да бир енъуьвге дейим даьвленип, басладылар…
Галима Курганова.
Суьвретте: савгалы орынларга тийисли болган окытувшылар.