Уллы Енъуьвдинъ алдында, язлыктынъ яркыраган куьнлеринде бизге тынышлы яшав савкатлаган баьтир-ердеслеримизди эсимизге аламыз. Ногай районында Хатын-кызлар совети муниципалитет администрациясынынъ эм ямагат организациялар коьтергишлеви мен Уллы Енъуьвдинъ 81-нши йыллыгына багысланган шатлыклы шаралар уйгынлайды.
Сондай шаралардынъ бириси болды бизим ердесимиз Аминат Оразбаевадынъ Уллы Аталык согысы йылларында коьрсеткен йигитлигине багысланган хатынлар автоювырувы. Бу шара бойынша Ленин эм Таьтли-Булак авылларынынъ мектеблерине 1945-нши йылдынъ май айында енъилген Рейхстаг йогарына илинген Енъуьв Байрагынынъ копиясы тапшырылды. Бу акция баьтирердеслеримиздинъ эстелигине сый этпеге, несиллер бирлигин коьрсетпеге, тарих эстелигининъ аьдетлерин сакламага каратылган.
Оьмирлер бойы «кавга хатын иси тувыл» деп айтылган. Эл шакырганда тек онынъ увыллары тувыл, кызлары да туратаганын Уллы Аталык согысы эм согыс спецоперациясы
коьрсетти. Хатынлар давдынъ йылязбасына аз данъклы бетлер язбаган.
Олар фронтта медиклер, летчиклер, снайперлер, разведчиклер, репортерлар болып ислегенлер. Ленинаулында тувган бизим ердесимиз Аминат Оразбаева согыс йылларында пехотада куллык эткен.
Автоювырувдынъ ашылувына багысланган шатлыклы митинг Терекли-Мектеб авылындагы Капельгородский атындагы паркындагы баьтирлер эстелигининъ касында оьтти. Шарады Кадрия атындагы мектебининъ окытувшысы Динара Заргишиева ашып юритти.
Йыйылганларга каратылган хошлав соьзин Ногай район администрация аькимбасынынъ орынбасары Мурат Шадиев айтты. Ол аьскер данъкынынъ йоллары бойынша
автоювырув бизге халкымыздынъ таза аспан уьшин берген баасын эсимизге салатаганын, оны эсте саклав эм яс несиллерге коьшируьв – бизим борыш экенин айтты. Согыс, ис, Савытлы куьшлер эм ыхтыяр саклав ветеранлар советининъ председатели Акманбет Сангишиев Уллы Аталык согысы йылларында 160 мынъ дагестанлы яв ман куьреспеге кеткенин, бу куьнлерде олардан тек 3 ветеран калганын билдирди. Солай ок митинг барысында Ногай район Ямагат палатасынынъ председатели Эльмурза Саитов, ДР Ямагат палатасынынъ агзасы, район Хатынкызлар советининъ председатели Асият Манкаева, Терекли-Мектеб авыл аькимбасы Марат Кулунчаков, Кадрия атындагы мектебининъ окытувшысы, Уллы Аталык согысы ветеранынынъ кызы Ийсиндик Динашева, С.Батыров атындагы саниятлар мектебининъ окытувшысы, согыс
катнасувшысы Аминат Оразбаевадынъ йиен кызы Эльмира Заргишиева шыгып соьйледилер.
Эстеликтен йол алган автоювырувда район ямагат организациялары: Хатын-кызлар совети, «Доблесть гор», «Движение первых», «Победа» волонтерлары, солай ок СВО ветеранлары, согыс ветеранлардынъ кызлары эм уныклары, СВО катнасувшыларынынъ аналары эм хатынлары катнастылар. Олар коьликлерин согыс ветеранлардынъ суьвретлери эм байраклары ман ярасыкладылар.
Ленин эм Таьтли-Булак авылларында автоювырув катнасувшыларын йылы йолыктылар. Окувшылар туьрли несил баьтирлер суьвретлерин, байраклар эм гуьл байламлар
колларына алып тизилисип турдылар. Мектеблер етекшилери Эльмира Аджекова эм Кабират Аккишиева конакларга хошлав соьзлерин айтып, балаларга шакырувлар эттилер.
Согыс йыллары, баьтир-ердеслер, тынышлыктынъ баасы акында педагогикалык исининъ ветераны, насихатшы Авасхан Кульниязова, ДР ат казанган врачы Асрет Абдурахманова, СВО барысында Эли уьшин янын берген аьскершидинъ анасы Кушимхан Аблезова, билимлендируьв боьлик етекшисининъ орынбасары Медина Гапарова, Кадрия атындагы мектебининъ етекшиси, СВО катнасувшыдынъ хатыны Альфия Акимова, Арсланбек авыл администрация ваькили Арслан Акбердиев оьз соьзинде айттылар. Эльмира Заргишиева оьзининъ абасы Аминат Оразбаевадынъ аьскер йолы акында хабарлады. «Зоя Космодемьянская йигитше ян бергенде, элимиздинъ
коьп яс кызлары онынъ уьшин явдан оьш алмага суьйип, фронтка кеттилер. Солардынъ бириси меним абам – Аминат Оразбаева. Ол Кара тенъиз фронтына туьскен,
Керчь, Крым, Севастополь калаларын коршалавда катнаскан, онынъ командири Леонид Ильич Брежнев болган. Абам медсестра болып аьрекетлеген. Ол орденлер эм медальлер мен савгаланган. Согыстан сонъ Аминат Оразбаева Казахстанга ислемеге кеткен эм сонда аьел курган. Онынъ юреги эм ойлары аьр дайым да тувган ери
мен байланыслы болган, ювыклары аман ма экен деп ол кыйналган. Ногай районына 1960-ншы йылларда келип, ол оьз аданасы, меним атам Расиль Заргишиевти тавып, оны ман эм балалары ман коьп йыллар узагына байланысты уьзбеген.
Эли Аминат Оразбаевадынъ йигитлигине йогары баа берген. Ога сол замандагы Казахстан Президенти Нурсултан Назарбаев байыр уьй берген. Аминат Оразбаева дуныядан 2018-нши йылда кешкен», – деди Эльмира Заргишиева.
Бу куьн ердеслеримиздинъ йигитлиги, эрклиги акында бек коьп соьзлер айтылды. Окувшылар янларыннан оьткерип согыс акында ятлавлар окыдылар, йырлар йырладылар. Биз аьр дайым да согыс майданларда ян бергенлерди эсимизде саклаякпыз, бас иемиз фронтта эм тылда енъуьвди ювыклатканларга, бу куьнлерде оьткен согыс
спецоперация катнасувшыларына да уьйкен савбол айтамыз.
Нурият Кожаева.
Суьвретте: шарадан коьринис.
