Йыл сайын сары тамбыз айында савлай элимиз ак юректен куьн сайын киши баьтирлик этетаган инсанларды кеспи байрамы ман кутлайды. Олар – врачлар, медсестралар, фельдшерлер, фармацевтлер, бу аьдемлер бизим ден савлыгымызды саклайдылар.
Медсестра – бу тек кеспи тувыл, ол – сол кеспиди сайлаган инсаннынъ бактысы. Онынъ колларында – аьдемнинъ яшавы. Медсестрадынъ куьни авырувлылардынъ акында каьр
шегуьв мен басланады, керекли процедураларды этип, ол куьндегилик исин бардырады. Соннан баскалай, медсестра оьзининъ ян йылувлыгы ман, коьтергишлеви мен кайбиримизди эмлейди. Кайдай кыйынлы заманларда медсестралар инсанлардынъ касында боладылар, сондай куьнлерде оьзлерин тутып болув, йогары кеспилиги авырувлыларга олар сенимли колларда экенин тагы да коьрсетедилер. Бу кеспиде тек эркли, шыдамлы, бавырмалы аьдемлер каладылар эм яшав бойынша инсанлардынъ ден
савлыгын ийгилендирип келедилер.
Надия Аскербий кызы Нургишиева – оьз кесписине алал куллыкшы. 25 йылдан бери ол юрегин де, янын да берип, ислейди медицина тармагында.
2021-нши йыл Каспийск каласында медучилище битирип, Ногай районынынъ больницасынынъ балалар боьлигинде аьрекетин баслаган. Сонъында Надия Аскербий кызы терапия боьлигинде, стоматология кабинетинде ислеген. Аьлиги заманда 11 йылдан бери СДП терапия боьлигинде куллыгын бардырады.
Кыйынлы эм яваплы кеспидинъ иесине: «Куллыгынъыз акында не зат айтпага боласыз?» деген соравды бермей болмадым.
– Куллыгымды суьемен, ол мага оьз исимнинъ сырагыларын куьн сайын коьрмеге, кыйынлы заманларда авырувлыларга бас тирев болмага эм ис сулыбымды оьстирмеге амал береди. Мага сенип келген инсанлардынъ эмленгени, ден савлыгы берк болганы – мага уьйкен суьйиниш, – деп яваплайды соравыма Надия Аскербий кызы.
Медициналык куьни мен кутлап, мен Надия Нургишиевага эм онынъ ис йолдасларына берк ден савлык, шыдамлык, ийгилик эм аьелинде наьсипти йорайман. Сизинъ эткен исинъиз алал.
Г.Бекмуратова.
Суьвретте: Н.Нургишиева.