Тамбыз айынынъ ызгы куьнлеринде Россияда яслардынъ уьстинликлерине, ямагат яшавда катнасувына багысланган байрам белгиленеди.
Кайбиримиз ясларга сенемиз, олардынъ колларында Россиядынъ онъайлы эм ийги яшавы, онынъ келеектегиси. Талаплы ясларымыз коьп. Сол несилдинъ ваькили, Ногай районынынъ Карасу авылында тувып-оьскен кызымыз Альвида Аруновадынъ акында буьгуьнги хабарым.
Альвида мектебте окыйтаган йыллардан алып оьзин окымыслы, талаплы этип коьрсетип келеятыр. Мектебтинъ ямагат яшавында белсен катнаскан, коьплеген олимпиадаларда, район, республикалык, Савлайроссиялык конкурсларда катнасып, баргылы орынлар алатаган эди Альвида – «Талапларга бай бизим Дагестан»,
«Тири классика», «Келеекке абыт» эм сондай баска. 2019-ншы йылда Альвида Арунова ятлав яттан окувшылардынъ съездинде делегат болган.
Оьз яшавын Альвида мектебти битирген сонъ медицина тармагы ман байланыстырмага токтасты.
– Кишкей заманнан алып мен медициналык куллыкшы болмага суьетаган эдим. Аьдемлердинъ авырувларын эмлемеге, оларга оьз исим мен пайда аькелмеге – меним бас ниетим. Инсанлардынъ ден савлыгын саклав, олардынъ яшавын куткарув – эмлевшидинъ биринши борышы, – деп айтады Альвида сайлаган кесписи акында.
2023-нши йыл Альвида Кисловодск каласына медициналык колледжине окымага туьседи эм бу куьнлерде окувын уьстинликли битиреди.
Колледжде окыган йылларда да Альвида баьри шараларда да катнаскан. Сол йыллардынъ ишинде халклар ара «Фельдшердинъ исинде тезлик ярдамы: теориядан аьрекетке дейим» онлайн-олимпиадасында биринши орынга тийисли болган. Солай ок Альвида «Диагност-2026» Савлайроссиялык олимпиадасында биринши
орынды алган.
Альвида Арунова тезден колына медициналык куллыкшысынынъ шайытламасын алаяк. Биз оны яслар куьни мен кутлап, келеекте оьз алдына салган мыратлары толганын, элимиздинъ, халкымыздынъ данъклы кызы болганын йораймыз.
Г.Бекмуратова.
Суьвретте: А.Арунова