Шилле айынынъ 26-ншы куьни, Дагестан Республикасынынъ Конституциясынынъ куьни, ДР Аькимбасы Владимир Васильев туьрли тармакларда ийги исин коьрсеткен аьрекетшилерге патшалык савгалар тапшырды.
Ол бу куьн йыйылганларды Дагестан Республикасынынъ Конституция куьни мен кутлап, сол республикамыздынъ оьрленуьвине уьйкен косым этетаган маьнели документтинъ кабыл этилинип алынган тарихи акында айтып кетти.
Конституция республикамызда тил бирликти, татымлыкты сакламага коьмегин эткен, демократиялык туьзилисининъ негизин салган, аьдем ыхтыярын эм эркинлигин энъ де йогары баалык экенин коьрсеткен. Сол принциплерге биз таянып, аьдемлердинъ оьз ис орынларында аьрекетлерин сапатлы толтырувы ман, закон талап этетаган борышларды этемиз.
Аьлиги заманларда биз республикамыздынъ медициналык тармагында илгериликлерди коьремиз, солар бизди суьйинтедилер. Солардынъ болувларына куьш салатаган куллыкшылар да бар. Аьдемлердинъ коррупция ман куьресуьв керек деген талаплавлары тек соьз бен айтылып койылмайды, ис аьрекет бойынша да сол куьресуьв коьринеди. Бу затлар баьриси де республикамыздагы оьткир соравларды шешуьвге ярдамын этеди, – деди Дагестан Республикасынынъ Аькимбасы В.Васильев.
Республикамыздынъ илгери барувына оьз косымын этип, патшалык савгага тийисли болган республика бойынша 43 куллыкшылар санында бизим ердесимиз Альфира Маушевна Мамаева да бар.
Альфира Маушевна Мамаева Ногай район ериндеги орталык больницасында 25 йылдан бери ис аьрекетин бардырады. Ол сол йыллар ишинде тек ийги исин бардырып, йогары дережеде ис сырагыларын берип келеди. Альфира 2016, 2017-нши эм 2019-ншы йылларда савлайроссиялык «Лучший инфекционист» шарасында катнасып, алдышы орынларга етискен. Баслапкы эки йылда ол республикамыз бойынша сол ийги атка тийисли болып калган болса, бу йыл Россия бойынша экинши савгалы орынды алган.
Аьли биз оны «Дагестан Республикасынынъ ат казанган врачы» деген сыйлы аты ман кутлаймыз. Буьгуьнлерге дейим Альфира Маушевна Мамаева районымызда ийги врач-инфекционист болып республика бойынша ийги сырагылар коьрсеткен болса, келеекте олардынъ ислери Россия бойынша тагы да оьр барганын йораймыз.
Г.Сагиндикова.
Суьвретте: ДР Аькимбасы В.Васильев А.Мамаева ман савгалавдан сонъ.
