Ногай район орталыгы Терекли-Мектеб авылдынъ Гамзат Аджигельдиев атындагы орамы районымыздынъ энъ уьйкен мектеби – Абдул-Хамид Джанибеков атындагы мектебине ювык орынласкан. Сол себептен бу орам ман эртен, туьсте эм кеште окувшы балалар уьйлериннен мектебке келедилер эм кайтадылар.

Орам Эдиге атындагы орталык орамы ман косылысканы ман байланыста бу ерде коьлик саны коьп болады. Сонынъ уьшин балалардынъ кавыфсызлыгын канагатлав ниетте Г.Аджигельдиев атындагы орамына яявларга юрмеге деп айырым тротуар салмага токтас алынган эди.
Быйыл куьзде сол токтаска коьре, бу орамда яявлар уьшин тротуардынъ буьгуьнлерде хыйлы кесеги ясалып биткен эм кулланувга да берилген. Сол куллыкларды «Ногай ДЭП-29» ОАО куллыкшылары яшавга шыгарганлар. Эндигиси окувшы балалар коьлик юретаган йолга туьспей, айырым йол ман мектебке барадылар.
Бизим хабаршы.
Суьвретте: Терекли-Мектеб авылдынъ Г.Аджигельдиев атындагы орамында курылган яявлар тротуары.