Аьр йыл сайын яз шагынынъ басланувы ман, июнь айынынъ 8-нши куьни Россия бойынша социаллык куллыкшысынынъ кеспи байрамы деп саналады.
Бу куьн элимиз бойынша социаллык куллыкшыларын кутлайдылар, ийги аьрекетшилерди белгилейдилер, савгалар берип, олардынъ этетаган алал исин алгыслайдылар.
Ногай районымыздынъ Карагас авылында Марина Зарманбет кызы Отегенова бу ис тармагында ислегенли отыз йылдан да артып барады. Оны авыл ясуьйкенлери (оьзи иси бойынша канагатлайтаганлар) бек сыйлайдылар эм коьбиси суьйип те калганлар, биревлери оны аьел агзасы этип те коьредилер.
Оьзининъ билдируьвине коьре, ис енъил тувыл, бек аьруьв оны анълаймыз, элбетте, аьдемлер мен байланыслы аьрекет кыйын болады, боьтен де ясуьйкенлер, олардынъ талаплавлары да, керексинуьвлери де баска.
Аьлиги яс несил мен тенълестиретаган болсак, яшаган заманлар да айлак куьшли баскаланады… Сога коьре, араларда анъламсызлык та болмага болады. Марина акында соьзимизди бардырайык, ол – сулыплы куллыкшы. Ясуьйкенлер мен де ислев бойынша эбин тавып калган. Оьзи медициналык кеспили специалист болады. Марина Зарманбет кызы канагатлайтаган авыл ясуьйкенлери онынъ акында тек ийги соьзлер айтадылар.
Марина Отегеновадынъ етекшилерине, ис аьрекети бойынша, авыл ясуьйкенлери: согыс спецоперациясынынъ катнасувшысынынъ анасы Маравхан Закарья кызы Оразбаевадан, Джумабике Абдулсаламовна Биарслановадынъ атыннан онынъ кызы Тамара Айдабуловадан, Шарипат Абдулвалитовна Ильясовадан разылык соьзлерин билдирген, оларга социаллык ярдамын тийдирип, буйымларын толтырувшы куллыкшыдынъ исине баа берилген хат туьскен.
Сол хат ишинде Марина Зарманбет кызы Отегенова акында онынъ куллыксуьерлиги, ясуьйкенди сыйлап болувы эм оьзининъ тапшырылган ис борышларын йогары дережеде толтырувы акында язылады.
– Меним анам Маринабизге келеек куьн коьнъилшен болады, ол ясуьйкенлердинъ уьйин наьсипке, куьн саьвлесине толтыратаган инсан деп айтпага болады. Мен оьзим 59 ясымда, эней де боламан, анам Джумабике уьшин парахат, онынъ аьр кайсы тилегин де Марина толтырады.., – деп язады оьз хатында Тамара Айдабулова.
Аьр кайсы ис аьрекетте де куллыкшыга кереги сол – толтырылган иске баа берилсе…
Аьлиги заманларда Марина Зарманбет кызы – исинде сый, абырай казанган куллыкшы. Онынъ куллыксуьерлиги, сайлаган кесписине алаллыгы Дагестан Республикасынынъ Ис эм социаллык оьрленуьв министерствосынынъ Сый грамотасы ман белгиленмеге каралады. Ол – шынтысы ман да сол савгага, белгиге тийисли инсан. Биз алдыда сулыплы
куллыкшыга тек уьстинликлерди йораймыз.
Бу куьнге дейим онынъ ийги иси Ногай районымыз, авыл администрацияларынынъ, КЦСОН етекшилевининъ грамоталары ман, Разылык хатлары ман белгиленген эди.
Галима Курганова.
Суьвретте: М.Отегенова авыл ясуьйкени М.Оразбаева ман.