Ис аьрекет аьдемди ярасыкламайды, ол оьзининъ терен билими мен, куллыксуьерлиги мен ис орынды ярасыклап келеди. Меним бу куьнги макаламнынъ бас келбети де сондай инсанлардынъ бириси – Аминат Рашид кызы Лукманова. Ол оьзининъ яшавынынъ коьп заманын суьйикли, яслыгында сайлаган кесписине – тербиялавшы
исине багыслап келеди. Яшавынынъ коьп заманын сога багыслаган куллыкшыдынъ талабы, сулыбы акында мен тизип язбасам да, оны ман бирге куллык эткен ис йолдаслары, онынъ берген дерислеринде болган аьдемлер бек аьруьв де биледилер.
Аминат Рашид кызынынъ аьр бир дериси, байрамларга багысланган шаралары бир-бириннен артык болмаса, кем болмайды. Ол яшав шагы ман бирге абытлап, янъы
технологиялар заманына дерислерин келистирип салады. Оьзим неше кере де шайыт болганман сулыплы тербиялавшыдынъ салган биювлерине (неге десе, наьсипке,
меним балаларымнынъ биреви онынъ кол астында балалар бавында болды, бу куьнлерде ол берген билим негизине таянып, окувды да бардырады). Ол оьзи тербиялайтаган балаларды куьпелеклер де, туьрли ярасык шешекейлер де, савыт-савран да этип, биювлер салады. Аминаттынъ кол астында тербияланган балалар мектебке барганда да, оьзлерининъ терен билимлерин коьрсетедилер. Аминат Рашидовна оьз исининъ негизине яратувшылык ойларын салып ислейди. Ол балаларды тербиялав бойынша токтастырылган методикаларга, оьзининъ де ойларына коьре, косымын этеди, янъылыклар киргистеди. Аминат Рашид кызы мектебте, педагогикалык училищеде окыган йылларында да оьзин тек ийги яклардан коьрсетип келген, ол катнаспаган бир шара да сол йылларда озгарылмаган деп айтсам да, оьтирик тувыл.
Аминат Рашид кызы бу куьнлерде сулыбы бай, ис етимислери аз тувыл куллыкшылар санында болады. Онынъ Ногай районымыздынъ «Юлдуз» балалар бавындагы
ис йыллары – байлыгы. Сол йыллар ишинде аз болмадылар етимислер де, енъуьвлер де. Ногай районынынъ сыйлы куллыкшылар тактасында да Аминат Лукмановадынъ суьврети ярасыкланып турган заманлар да болдылар. Республика, район кезеклеринде озгарылган «Йыл тербиялавшысы» шараларында катнасып, савгалы орынларды алып, оьзине тийисли атты да яклаган. Онынъ уьй архивинде ийги иси уьшин берилген Сый грамоталары айлак коьп, сол да сейир тувыл, оьзи аьрекет эткен тармагынынъ етекшилеви мен иси белгиленетаганынынъ эм бааланатаганнынъ шайыты болады.
2024-нши йылда Аминат Рашидовна ДР Халк Йыйыныннан коьпйыллык етимисли аьрекети уьшин Разылык хатка да тийисли болган. Ол – Дагестан Республикасынынъ билимлендируьв тармагынынъ отличниги, оьз ис ериндеги аьдем. Балалар ман ис аьрекетти бардырув тыныш тувыл, боьтен де аьлиги заманларда, аьр бир баладынъ, кишкей болса да, оьзойы да, касиети де бар. Аминат Рашидовнадынъ сайлаган кесписине алаллыгы ман ислейтаганын «Юлдуз» балалар бавынынъ
етекшиси Солтанат Сталинбек кызы Телемишева да белгилейди.
– Аминат Рашид кызындай болып ис аьрекетин суьетаган аьдемлер саны коьп тувыл, ол балаларга тек суьйимин тувыл, янын берип ислейтаган аьдем, – дейди ол.
Алдымызда – бу тармакта куллык этетаганлардынъ кеспи байрамы. Сол куьнде Аминат Рашид кызына эм бу тармактынъ баьри куллыкшыларына да ден савлыкты, уьстинликлерди йорайман. Алдыда тек таза аспан астында оьссин сиз тербиялайтаган саьбийлер.
Галима Курганова,
РФ Журналистлер союзынынъ агзасы.
Суьвретте: А.Лукманова.
