«Ногайский район» МР аькимбасы Джамалутдин Эсиргепов яшавшыларды кабыл этип алды. Ол биринши орынга аьдемлердинъ маьселелерин, соравларын салып, соларды шешуьв уьстинде ислейди. Муниципалитеттинъ басшысы гражданлардынъ ога келип, ярдам сорап, шакырув эткенлерине уьйкен маьне береди – аьр бир келуьв айырым каралады, керекли специалистлердинъ катнасувы ман маьселе шешиледи.
Район аькимбасына Терекли-Мектеб авылынынъ яшавшылары келгенлер. Мадина Куруптурсунова куллык излевде коьмек этинъиз деген тилек пен келген. Джамалутдин Айнадинович бу соравды оьз тергеви астына алып, кесписине коьре куллык излестируьвге тапшырув этти. Ханбике Кадилова район басшысына ер мен байланыслы сорав ман келген. Д.Эсиргепов баьри документлерди тергеп, специалистлерге закон бойынша маьселеди шешпеге деген тапшырув берди.
Район администрациясы аьр бир шакырувдынъ шешилуьвин канагатлав уьстинде аьрекетлейди.
Бизим хабаршы.