Бизим ногай халкымыз наьсипли, онынъ оьз тувган ерин, шоьлин данъклаган кызы Бийке Исхак кызы Кулунчакова болганына. Шоьлимиздинъ бозторгайы, Дагестан Халк язувшысы Бийке Кулунчаковадынъ сыйлы мерекесине багысланып, шатлыклы шаралар оьтедилер.
Дагестан Республикасынынъ Ногай районынынъ Терекли-Мектеб авылынынъ А-Х.Джанибеков атындагы мектебинде Бийке Кулунчаковадынъ «Казбек» повести бойынша конкурс-инсценирование оьтти. Конкурста районнынъ мектеблерининъ уьйкен классларынынъ окувшылары катнастылар. Шарады уйгынлавшы – Дагестан Язувшылар союзы. Конкурсты ногай язувшылар секциясынынъ етекшиси Гульфира Бекмуратова юритти. Ол Бийке Исхак кызынынъ яратувшылык йолы акында айтып, «Казбек» повестин язувшы студент йылларында язганын белгиледи. Бу ярасык шыгарма – биринши суьйим, ата-ана эм балалар байланысы акында. Жюри сырасында Ногай районынынъ Билимлендируьв управлениесининъ етекшисининъ орынбасары Медина Гапарова, Ногай патшалык драмалык театрынынъ алдышы актрисасы Бурлиянт Нургишиева, шаир Джамиля Аманбаева катнастылар.
Биринши орынды Терекли-Мектеб авыл мектеби алды, экинши орынга Кумлы эм Червленные-Буруны авыл мектеблери тийисли болдылар, уьшинши орынды Нариман эм Эдиге мектеблерининъ окувшылары боьлистилер.
Карагас авылында Бийке Кулунчаковадынъ мерекесине багысланып, язувшы ман яратувшылык йолыгыс озды, шара уйгынлавшысы – ана тил окытувшысы, шаир Салимет Майлыбаева эди. Конак эсабында шаирлик кешлигинде «Россиядынъ ат казанган окытувшысы» Зухра Мусаурова, Ногай районынынъ Хатын-кызлар советининъ председатели Асият Манкаева, Ногай районынынъ Билимлендируьв управлениесининъ етекшисининъ орынбасары Медина Гапарова, шаир Гульфира Бекмуратова, йырлавшы Зульфия Аджигеримова, Карагас авылынынъ маданият уьйининъ директоры Алимет Аблезова катнастылар.
Концерт программасында Бийке Кулунчаковадынъ йырлары йырланды. А.Аблезовадынъ тербияланувшылары, 4-нши классынынъ кызлары ярасык биюв коьрсеттилер. Азиза Аджигельдиева, Айшат Эдильбаева, Айдан Агабалаева, Азалия Чамалаева эм Назим Аблезов ятлавлар, Ясмина Биарсланова эм Дженнет Махмудова кара соьз уьзиклерин окыдылар. Кайтип ярасык этип Суюмбике Шадырова «Меним балалыгымнынъ орамы» повестининъ уьзигин окыды. Кутлав соьзин Бийке Кулунчаковага ерли мектеб директоры Н.Шураева эм окытувшылар айттылар. Салимет Майлыбаева язувшыга багыслаган ятлавын окыды.
Нефтекум районынынъ Коясыл авылында маданият уьйининъ директоры Тереза Дукуваховна Аджиевадынъ уйгынлавы ман Бийке Исхак кызы Кулунчакова ман йолыгыс оьтти. Шарада дагестан шаирлери Магомет-Али Ханов, Салимет Майлыбаева, Гульфира Бекмуратова, Терекли-Мектеб авылынынъ А-Х.Джанибеков атындагы мектебининъ директоры Курасхан Ярикбаева, КЧР шаири Асан Найманов катнастылар. Энъ де сыйлы конак шаирлик кешликте Дагестан Халк язувшысы Бийке Кулунчакова эди. Язувшы йыйылганларга оьз яратувшылык эм яшав йолы акында хабарлады, берилген соравларга яваплады.
Концерт программасында Бийке Кулунчаковадынъ йырлары, повестьлериннен уьзиклер, яттан ятлавлары окылды. «Бияла» балалар театр коллективи «Шоьлдинъ ак кызы – Янбикеш» пьесасы бойынша спектакльден уьзигин кайдай ярасыклы этип коьрсеттилер. Ана тилининъ клубынынъ тербияланувшылары Бийке Кулунчаковадынъ «Меним балалыгымнынъ орамы» повести бойынша суьвретлер ясап, язувшыга савгаладылар. Авыл яшавшылары сахнага шыгып, Бийке Исхак кызына ийги йоравлар айттылар, ятлавларын окыдылар.
Соьйтип, Бийке Кулунчаковадынъ мерекесине багысланып, ярасык яратувшылык шаралар оьттилер. Дагестан Халк язувшысы шараларда соьйлеген заманда баьри уйгынлавшыларга оьз разылыгын билдирди. Яс несилге ана тилинъизди суьйинъиз, оны уьйренинъиз, ногайша соьйленъиз деп шакырув этти. Мен ойлайман, талаплы язувшыдынъ: «Оьз маданиятын эм оьз тувган тилин йойган ногайлар баска халклардынъ кулы боладылар» деген соьзлер кайбиримизди де ойландырар эм ана тилимизди сакламага, таралтпага даьвлендирер.
Г.Абдулакимова.
Суьвретте: Коясыл авылында шарадан коьринис.