Аьр бир аьдемнинъ энъ уьйкен байлыгы – онынъ аьели, аьсирет аьдемлери. Оьз аьелимнинъ акында айтып басласам, юрегимди оьктемлик бийлейди, неге десе аьел тарихимиз бек оьнерли эм бай. Айтып озайым, нагашатам Уллы Аталык согысынынъ катнасувшысы Магомед Кадыр увылы Узаировты оьз юртындагы яшавшылар эсинде саклайдылар. Уьйкен атам Исмак Элгонды увылы Нукаев Кумлы авылында ветврач болып ислеген. Онынъ агасы Исхак Элгонды увылы болса, белгили летчик, немец-фашистлерин кырып, сол кан тоьгисли кавгада Берлинге дейим еткен. Уьйкен тетем Куьмисхан Магомед Кызы Шихмурзаева (белгили аьлим Джалалдин Шихмурзаевтинъ карындасы) уста ис тигуьвши болган, сав авыл яшавшылары ога кийим тиктиртпеге келгенлер. Атамнынъ атасы Нукаев Алимхан Исмак увылы атаклы хирург болып Новгород областинде, сонъ Дагестаннынъ Ногай районында куллык эткен. Онынъ ис сулыбы акында коьп аьдемлер аьлиге дейим йылувлык пан эскередилер. Тетем Тойбике Магомед кызы болса, неше йыллардан бери мектебте билимли окувшыларды уьйкен йолга салып барады, ол «Россия Федерациясынынъ ат казанган окытувшысы». Онынъ окувшылары яшав йолында ийги аьдемлер, атаклы исшилер болып шыкканлар. Абам Алтынай яшавын медицина тармагы ман байлаган, ол аьдемлерди тек дарман тувыл, юмсак соьзлери, йылувлыгы эм аьдемшилиги мен эмлейди. Атам Магомед Алимхан увылы бизге оьз тайпамыздынъ данъклы аьдемлери акында хабарлаганда, мени, биз де олардынъ ызын ызлап, Элимизге пайдалы болмага керекпиз, деген ойлар бийлейдилер. Яшавда аьр аьдем оьз орынын тавып, сайлаган кесписине алал, элине пайдалы болмага тийисли, деп ойлайман. Мен аьли 8-нши класста окыйман, уьйде анама, тетеме ярдамласаман, аданасым Аминге, синълилерим Фатима эм Хадиджага коьрим болмага шалысаман. Аьелимиз татым яшайды. Биз авылдаслар эм кардаш-тувганлар ман йылы катнасамыз, кереккенге кол да созамыз. Байрамларда ногай асларын асамыз, туьрли зияпетлер аьзирлеймиз. Тетем бурынгы ногай халклардынъ кийимин кийип, бизди куьезлендиреди. Мен халкымызды, ана тилимизди, маданиятымызды эм адабиятымызды бек суьемен. Сол суьйимди мага аьелимде ясуьйкенлерим эндиредилер. Аьелим – оьктемлигим, аьелим – наьсибим! Наима Нукаева, Тарумов районынынъ Ново-Дмитриевка авыл орта мектебининъ окувшысы.