Карашай-Шеркеш Республикасынынъ сыйлы тренери Ануар Алабердовтынъ аты суьйикли ногай халкымыздынъ йылязбасына белгили аьдемлердинъ бириси болып кирген. Ол коьп йыллардынъ бойында Карашай-Шеркеш Республикасында футболды оьрлендируьв мен каьрлеген. Онынъ етекшилеген командалары коьп кере Карашай-Шеркеш эм Казахстан республикаларынынъ енъуьвшилери болганлар. Болымлы ердесимиз оьз яшавын халкына, спортка багыслаган эди.
Халкымыздынъ коьплеген яс аркаларын тербиялап, яшавдынъ кенъ йолларына аьзирлеген. Ануар Аскербиевич тек футболга тувыл, эр балалардынъ окув етимислерине де айырым эс берип турган. Окувда да, спортта да етимисли болув керек, деп айтатаган эди сав заманында Ануар Аскербиевич.
Кыскаша айтканда, ол халкын алал юреги мен суьйген аьдем эм уста тренер болган.
Казахстаннан тувган ерине тыншаювга кайтса, дайым да «Ногай давысы» газетасынынъ эм «Маьметекей» адабият-суьвретлев журналынынъ редакцияларына янъы кызыклы макалаларын эм балалар уьшин ойынлары акында язганларын аькелип туратаган эди. Коьп йыллар артта ногай журналистлери арасында Тогызкумалак халк ойыны бойынша кызыклы турнир де озгарган эди. Сынаслар энъ де ийгилерди белгиледи.
Солай болып, 2013-нши йылдынъ язлыгында «Маьметекей» журналдынъ Кубогына багыслап, футбол бойынша турнир озгардык.
Ануар Алабердовтынъ ярдамы ман турнирге Казахстаннан эки команда келди. Спорт шарасын ЭркинШахар поселогынынъ орта билимлендируьв мектебининъ азбарындагы спорт майданында озгардык. Сол халклар ара турнирде Каракия районыннан келген команда баргылы биринши орынды эм турнирдинъ эстеликли Кубогын алып кетти. Айтувымнынъ маьнеси сол, Ануар Аскербиевич тек бу турнирди озгарувга тувыл, яшав бойы
юзлеген сондай шараларды уйгынлавга коьп куьшин салган.
Коьп заман кетпей, ердесимиздинъ атын оьмирлендируьв мырат пан Казахстан Республикасынынъ Мангистау областининъ Каракиян районынынъ Курык деген юртында футбол бойынша ветеранлар арасында регионлар ара турнир озды. Спорт шарасын Каракиян районынынъ аькимбасы, сол ок
районнынъ футбол Федерациясы уйгынлаган эдилер.
Турнирде савлайы алты команда катнаскан. Баргылы биринши орынды – «Каракия» (Каракиян районы), экиншиди – «АктасЖангак» (Мунайлин районы), уьшиншиди – «Актау» (Актау каласы), доьртинши орынды Аштархан областиннен «Курмангазы» командалары алдылар. Енъуьвшилерге
эм турнирдинъ катнасувшыларына дипломлар, кубоклар эм Ануар Алабердовтынъ суьврети ясалган медальлер тапшырылдылар.
Уйгынлавшылардынъ шакырувы ман турнирде Ануар Алабердовтынъ увылы Арсен де катнаскан. Турнирдинъ ябылувында разылык соьзлерин белгили тренердинъ увылы Арсен Алабердов та айтты эм Ногай район администрациясынынъ атыннан спорт шарадынъ уйгынлавшыларына Разылык хатты, енъуьвши командага эстеликли кубокты савгалады.
А.Найманов.
Суьвретте: шарадан коьринис
