Тегин коьлик. Кимге?
Балалар – ямагатты кеплеек янъы несил. Коьпбалалы аьеллерди колтыклап, патшалыгымыз келеекке пайдалыгы ман акша амалларын киритеди. Буьгуьнде ол — ийги яшав аьллерин туьзуьвге каратылган коьп яклы коьмек. Мунда финанс тоьлевлер, туьрли льготалар, балалар бавларында тегин ерлер, билимлендируьв тармагы эм сондай баска. Буьгуьнде яшавга киритилип шешилмеге керек соравлардынъ бириси – коьпбалалы аьеллерди автокоьлиги мен канагатлав.
Автокоьлик, эгер аьел ямагат коьлигининъ оьрленмеген инфраструктурасы орын тапкан районда яшайтаган болса, куллыкка, секцияларга, кружокларга тез етпеге эп береди. Автокоьлик аьелге баьриси бирге кезбеге эм тыншаймага янъы амаллар ашады. Коьп балалы аьеллер кызыклы ерлер мен кыдырмага, таза авада ял алмага боладылар. А автокоьлик ярдамы ман кыдырув ямагат коьликте юруьв уьшин тоьлевден кем болады, льготаларды эсапка алув ман да.
Кимге тийисли экен коьпбалалы аьели уьшин тегин автокоьлиги? Колайсыз яшайтаган копбалалы аьеллердинъ тоьмендеги шартларды тутув ман тегин автокоьлик алмага ыхтыяры бар, эгер аьелде яшар уьшин бир аьдемге энъ киши кыйын ак (Дагестан Республикасында ол 14062 маьне акша эсабында токтастырылган) кадериннен артпаса:
а) 2022-нши йылдынъ 1-нши январиннен алып аьелде оныншы яде оннан сонъ тувган (яде саклавга алынган) бала болса;
б) автокоьлик (микроавтобус) алувга аьризе язган мезгилге аьелде энъ уьйкен бала 23 ясыннан озбаган болса;
в) эгер автокоьлик алмага аьризе язган аьдем эм онынъ аьелининъ агзалары, Россия гражданлары болып, дайым Дагестан Республика еринде яшайтаган болса;
г) эгер автокоьлик алувга аьризе берген мезгилге баладынъ (балалардынъ) ата-аналары (саклавга алганлар) Дагестан Республика еринде дайым яшайтаган адреси бойынша 5 йылдан кем тувыл заман регистрацияланган болсалар;
д) эгер автокоьлик (микроавтобус) алувга аьризе берген мезгилге баладынъ (балалардынъ) ата-анасы (саклавга алганлар), судка тартылмаган яде кесилген судтынъ болжалы биткен болса;
е) эгер баладынъ (балалардынъ) ата-анасы (саклавга алганлар) ата-ана ыхтыярларыннан тайдырылган, солай ок ата-ана ыхтыярларыннан кесек заманга тайдырылган болса, эгер балага (балаларга) коршалав (опека)
деген токтастырылмаган болса, эгер бала (балалар) оьксиз балалар яде ата-анасы ягыннан коршаланмай калган балалар ерлестирилетаган организацияга ерлестирилмеген болса;
ж) эгер аьел социаллык кавыфлы аьлде деп саналмаган болса.
