Куьезимизге куьез ызгы заманларда косадылар Ногай районынынъ яс шатраш ойнавшылары. Ызгы заманларда олар республика кезегинде озган туьрли базласларга кетсе, енъуьвши болып кайтаякларына бизде шек калмайды. Яс шатраш ойнавшыларымыз энъ де куьшли деп саналган республикамыздынъ бас каласы Махачкалада ойынга уьйренген шахматистлер мен бирге савгалы орынларды бийлейдилер. Бу йолай болса, олардынъ сырагылары тагы да артты.
Янъыларда Махачкалада шахматлар бойынша Дагестаннынъ экинши кубогы озды. Йыл сайын коьп талаплы шахмат ойнавшыларын тербиялаган белгили балалар тренери Кадыр Исмаиловтынъ эстелигине базласлардынъ бу кезеги багысланып озадылар. Мунда 9 эм 13 ясына дейим республикадынъ 70 яс шахмат ойнавшысы катнасты, олардынъ
сырасында Ногай районнан 4 бала бар эди.
Эки куьн узагына базласлар катнасувшылары кызыклы ойынлар коьрсеттилер. Тогыз ясына дейим балалар сырасында Ногай районыннан Альберт Елакаев енъуьвши болды. Экинши орынды Махачкаладан Абдурахман Магомедов казанды. Уьшинши орынга энъ де кишкей базласлар катнасувшысы 5 ясындагы бизим районнынъ ваькили
Давид Елакаев тийисли болды. Тогыз ясына толмаган кызлар сырасында экинши орынды тагы да Ногай районыннан Сафия Уразакаева бийледи. Биз балалардынъ уьстинликлерине суьйинип, оларга аьли де уьйкен енъуьвлерди эм шатраштынъ кенъ, ашык йолын йораймыз.
Н.Кожаева.
Суьвретте: шарадан сонъ.