Бу йыл филология илмилеринъ кандидаты, адабиятшы, тил мен каьрлевши, Карашай-Шеркеш гуманитарлык тергев институтынынъ адабият эм фольклор боьлигининъ алдышы илми аьрекетшиси, Россия Язувшылар эм Журналистлер союзларынынъ агзасы, Дагестаннынъ эм КарашайШеркеш республикаларынынъ ат казанган илми аьрекетшиси Ашим Имам-Маземович Сикалиев тувганлы 90 йыл толаяк эди. Ол – ногай халк яратувшылыгына сав яшавын багыслап келгенлердинъ бириси. Аьлимнинъ аты тек Элимиздинъ тюркологиялык илмисине тувыл, онынъ тысында да ийги таныс. Ол – ногайлар яшайтаган туьрли регионларында экспедиция ман барып, халк арасында юрип, фольклорды ынжы мошактай этип йыйнап, ногай миллетимиздинъ анъ-акыл асабалыгын саклавда эм оны халкымыз арасында кенъ яйылдырувда номай уьлисин коскан аьдемлердинъ бириси. Ол – 14 илми китаплердинъ, 90-нан артык илми макалалардынъ авторы. Илми мен каьрлевши ямагат арасында белгили аьлимнинъ оьзиннен сонъ калдырган куллыкларынынъ буьгуьнлерге дейим де сыйы уьйкен, тергевшилер олар ман йыйы пайдаланып келедилер. Илмилик аьрекети мен каьрлеп калмай, ол адабият асарларынынъ уьстинде де емисли куллык этип келген. Солай болып аьлим коьплеген художестволык шыгармаларынынъ авторы да болады. Ашим Сикалиевтинъ 90 йыллык мерекесине КарашайШеркеш гуманитарлык тергев институтында оьз архивиннен илми-тюркологы И-М.Сикалиев пен язылып алынган халк авызлама яратувшылыгы бойынша макалалары Карашай-Шеркеш гуманитарлык баспага бес топламалы китаби бу йылдынъ кырк кийик айында дуныя ярыгын коьреек. Онынъ ислери, экспедициялары, язып алувы аркалы халкымыздынъ маданият асабалык байлыгы, заман оьтип мутылмайды, оьмирлер яшап, несилден-несилге коьшип келеегине соьз йок. 

Бизим хабаршы.