Бу йыл россия маданияты «Толковый словарь живого великорусского языка» деген баалы исининъ иеси, уллы орыс тилининъ белгили этнографы, лексикографы эм язувшысы Владимир Иванович Дальдинъ тувганлы 225-нши йыллык мерекесин белгилейди. Орыс тилининъ кенъ байлыгын коьрсеткен сол соьзлик, халк соьйлеви, аьдетлери эм маданияты акында билимлерининъ керекли булагы болып, буьгуьнлерге дейим де белсенли кулланылып келеди. Маьнели мерекеге багысланып, Россия Федерациясынынъ маданият эм билимлендируьв минстерстволары ман «Культура для школьников» деген маданият-билимлендируьв ведомстволар аралык проекти аьрекетлеп баслаган. Сол проект бойынша «Великое наследие Владимира Даля» деген оьсип келеятырган аркады уллы этнографтынъ, язувшыдынъ асабалыгына эм яратувшылыгына эсин каратувга шакыратаган Савлайроссиялык акция яшавга шыгарылды. Акцияда элимиз бойынша 8,5 мынъга ювык окувшылар ортакшылык эттилер. Олардынъ тек юзи енъуьвшилер сырасында боладылар. Енъуьвшилер арасында Кизляр районындагы Михеев авыл орта мектебининъ окувшысы Абдулхалик Габибулаев те бар. «Дагестанский узор» деген оьз исинде Абдулхалик Дальдинъ соьзлигиннен кавказизмлерди (кавказ халклар тиллериннен алынган соьзлериннен головоломка туьзген) алып кулланган. Ястынъ насихатшысы, орыс тил бойынша сабагыннан окытувшысы Мархаба Батыровна Мусакаевадынъ окувшысы Абдулхалик Габибулаевтинъ коьрсеткен етимисинде уьлиси бек уьйкен. Коьпйыллык ис аьрекети болган эм окувшылар ман ислевде бай сулыбын казанган Мархаба Батыровна оьз окувшысын сондай маьнели етимиске аьзирлеп эм коьнъиллендирип келди. Онынъ етекшилиги астында тербияланувшылары, окытувшысынынъ йогары кеспилигин, яс аркады тербиялавда оьз исине алаллыгын беркитип, коьп кере туьрли оьлшемдеги баргылы орынларына тийисли болып келедилер.

 Суьвретте: енъуьвши Абдулхалик Габибулаев.