Ногай район администрациясында оьктемликке эм ян авырувга толган шара оьтти: согыс спецоперация барысында янларын берген уьш ердеслеримиздинъ аьеллерине олардынъ патшалык савгалары тапшырылды.
Йолыгыста Ногай район аькимбасы Джамалутдин Эсиргепов, район аькимбасынынъ орынбасары Мурат Шадиев, «Ногайский район» МР Депутатлар Йыйынынынъ председатели Алибек Менласанов, Тарумов эм Ногай районлар бойынша аьскер комиссары Ваха Хадизов, «Аталыкты коршалавшылар» фондынынъ социаллык координаторы Аскерхан Межитов, Червленные Буруны авыл аькимбасы Рустам Абдулбариев, баьтирлердинъ ювыклары ортакшыладылар.
Россия Федерациясынынъ Президентининъ буйырыгы ман, аьскер борышын толтырган мезгилде эрлик эм йигитлик коьрсеткенлери уьшин, Эрлик ордени мен (оьлген сонъ) бизим ердеслеримиз – Булат Кумарбекович Рахмедов
(Червленные Буруны авылыннан), Джамбул Арслан-Алиевич Эстуганов (Куьнбатар), Эмиль Русланбекович Суюндиков (Терекли-Мектеб) тийисли этилингенлер. Бу савгалар – Эли уьшин янын аямаганлардынъ йигитлиги акында дайымлык эстинъ белгиси боладылар.

 
Йыйылганлар алдына шыгып соьйлевинде Ногай район аькимбасы Джамалутдин Айнадинович согыс спецоперация аьдемлер йойымсыз оьтип болмайтаганын белгиледи.
– Йойымлар акында айтув дайым да кыйын, яшавдан яс йигитлер: аталар, агалар, увыллар, ян йолдаслар кетсе, боьтен де авыр болады. Бу куьн биз энъ де аявлы – яшавларын аямаган ердеслеримиз алдында оьз басымызды иемиз. Олар Россия кызыксынувларын, кардаш халкты эм элимиздинъ сыйын коршалап, оьз яшавларын
аямадылар. Биз олардынъ баьтирлигин бир де мутпаспыз. Олардынъ йигитлигинде яс несиллер тербияланарлар, – деди Джамалутдин Эсиргепов. Булат Рахмедовтынъ Эрлик ордени онынъ анасы эм карындасына, Джамбул Эстуга-
новтынъ савгасы хатыны эм кызына, Эмиль Суюндиковтыкы – атасы ман анасы Русланбек эм Назира Суюндиковларга тапшырылды.
Олардынъ аьр бирисине аьзиз, ювык аьдемининъ савгасын алув мезгили айлак та уьйкен маьнели эди. Бу орденлер олар уьшин тек патшалык савгалар болып калмай, район яшавшыларынынъ юреклеринде яшаяк ювык аьдемлерининъ эрлиги, йигитлиги акында эске салув да болады.
Н.Кожаева.
Суьвретлерде: орденлер тапшырув мезгили.