Конъысы Тарумов районынынъ Аневское авылыннан да хыйлы яслар буьгуьнлерде Россия Коршаланув министерствосы ман келисуьвлер туьзип, Россия аьскерлери юритип турган согыс спецоперациясында шынты эр кимик катнасадылар. Олардынъ бириси бизим яс ногай йигитимиз Эдильбай Мурат увылы Доржиев СВО басланган 2022-нши йылдан алып, сонынъ энъ маьнели борышларын яваплы кепте толтырады.
Эдильбай бу авылда 2000-ншы йылда тувып оьскен. Атайы Эдильбайдай берк, абырайлы болсын деген ырым ман янъы тувган саьбийге де онынъ атын бергенлер. Ол мундагы мектебте тек аьруьв эм ийги белгилерге окыятып, алдыдагы яшав бактысын аьскер кесписи мен байланыстырмага бек суьетаган болган. Мектебте спорт пан досласканы уьшин ога 2017-нши йылда «ГТО Савлайроссиялык физкультура-спорт комплексининъ алтын белгиси» тапшырылган.
Сол суьйимлиги мен ол мектебте 11 классты кутарып, Тюмень каладагы йогары аьскер училищесине окувга
туьспеге барады. Баьри сынавларды береди, ама туьспеге эки балл етиспеген. Болса да ол кайратланып сол йыл
Сургуттагы политехникалык колледжине окувга туьседи. Сонда ийги окыганы уьшин йогары стипендия алган
эм колледжди уьстинликли битирген. Эдильбай Сургутта кесек заман темир иритуьвши болып ислеген, сонъ
оны 2019-ншы йылда Россия Савытлы куьшлери сырасына эр борышын толтырмага шакырганлар. Алыстагы Куьнтуварда Уссурийск каласында орынласкан ракета-зениткалы аьскер боьлигинде куллык эткен. Соьйтип,
алты айдан сонъ ол РФ Коршаланув министерствосы ман келисуьв туьзип, сол ок еринде армаган аьскер боры-
шын толтырады.
Бир кесек заманнан сонъ оны Сирия элинде юритилип турган согыс аьрекетинде катнасувга йибергенлер.
Сонда Эдильбай Доржиев бир йыл алты ай узагында аьскер командованиесининъ буйырыкларын толтырады. Аьлиги заманда ол согыс аьрекетининъ ветераны болып саналады.
Ол РФ Коршаланув министерствосы атыннан «Сириядагы согыс операциясынынъ катнасувшысына» эм «Аьскер
дослыгын беркитуьви уьшин» деген эки ведомстволык медальлери мен савгаланган.
Аьлиги заманда гвардия уллы сержанты Эдильбай-ердесимиз 4 йылдан артык заман ракета-зениткалы аьскер
сырасында СВО борышларын толтырады. Буьгуьнлерде ракета-зениткалы аьскерлери Украинадынъ согыс алат-
ларын шыгаратаган заводларын, соларды тасыйтаган йолларын, коьпирлерин бузув борышларын белсенли толтырадылар эм сондай аьрекети мен енъуьвди ювыклатувга оьз косымын этедилер. СВО тапшырмаларын
йигитлерше толтырувы уьшин ога 2025-нши йылдынъ 21-нши ноябринде «Аьскершилик данъкы уьшин», сол йылдынъ 2-нши декабринде болса, А.Суворов медальлери де берилген.
Быйыл август айында кезекли отпускка келген аьсеринде Эдильбай ата-анасын, карындасы Куьнбийкеди эм баьри кардаш-ювыкларын куьезлендирип конъысы Эдиге авылдан Индира атлы кызга уьйленди. Ога дейим ол уьйленмеге ымтылмайтаган эди, карындасы Куьнбийкединъ айтувы ман: «Мен аьли согыста юремен, уьйленсем, хатыным мени уьйде саклап олтыраяк», – дейтаган болган. Болса да Индира косагы оны «не шаклы заман керек болса, сол шаклы караякпан», – деген явабы ман ястынъ юрегин бийлеп алды.
Биз де Эдильбай-йигитимизге берк ден савлыкты, кайсы ерде де эмишликти, аман-эсен юргенин йораймыз!
М-А.Ханов.
Суьвретте: Эдильбай Доржиев.