Туьрли спорт шаралары, сонынъ ишинде, аьел «Зарница» ойыны да, ясларда оьз Эли уьшин оьктемлик сезимлери кепленуьвде, Аталыкка кызмет этпеге аьзир болувда уьйкен маьнеди тутады. Янъыларда Дагестанда Савлайроссиялык аьел согыспатриотлык ойынынынъ Бириншилер козгалысы эм Дагестан Республикасынынъ Яслар ислери бойынша министерствосынынъ баславы астында аьел «Зарница» шарасынынъ регионаллык кезеги болып йогары коьнъилде озды. Сол куьн Махачкалада Дагестаннынъ туьрли районларыннан аьел агзаларыннан туьзилген командалары йыйылган эдилер. Шара катнасувшылары, туьрли сынавларын оьтип, йогары оьлшемде аьзирликти эм аьел татымлыгын коьрсеттилер. Спорт базласувларынынъ тамамында куьшли деген енъуьвши аьел командалары белгилендилер. Тарумов районынынъ НовоДмитриевка авылыннан «Крепость» деген Манаповлардынъ аьел командасы зарница ойынынынъ регионаллык кезегинде 2-нши орынды бийлеп, ез баргысынынъ иеси болды. Аьел командаларына спорт базласувындагы аьр бир сынав – ол тыпаклыкка, тапкырлыкка эм бир команда эсабында аьрекетлеп болувга тергев болды. Соьйтип, сол баьри алдына салынган борыш-сынавларын да Манаповлардынъ аьели етмисли оьтип, енъуьвшилер сырасына кирди. Биз де сол аьелин спорт шарасында казанган экинши орыны ман кутлап, оларга, келеекте де бийик енъуьвлери, ярык етисуьвлери коьп болганын, оьз районынынъ атын данъклатканын йораймыз. 

Г.Нурдинова. Суьвретте: енъуьвши Манаповлардынъ аьели.