Полиция пункты ашылды
Кизляр районынынъ Крайновка авылында аьлиги заманга келисли янъы участковый полиция пункты аьрекетлеп баслады. Ол уьстимиздеги йылдынъ караша айынынъ 13-нши куьнинде шатлыклы аьлде ашылды. Шарада Дагестан Республикасы бойынша Иш ислер министерствосынынъ етекшиси полициядынъ генераллейтенанты Абдурашид Магомедов, Кизляр район аькимбасы Аким Микиров, Крайновка авыл администрация аькимбасы Артур Рамазанов, Кизляр каласындагы коньяк заводынынъ бас етекшисининъ орынбасары Зубаир Омаров, Россия Федерациясынынъ Иш ислер министерствосынынъ Кизляр районы бойынша боьлигининъ куллыкшылары, баска болып, ерли яшавшылар ортакшылык эттилер. Шарады Дагестан Республикасы бойынша Иш ислер министерствосынынъ етекшиси полициядынъ генераллейтенанты Абдурашид Магомедов ашты. – Буьгуьн бек маьнели куьн – полициядынъ участковый пункты ашылып туры. Полиция пунктынынъ халкымызга ювык ерде болувы бизге, кавыфсызлыкты канагатлав бойынша оьз исимизди тез аьрекетте эм етимисли толтырмага амал береек, – деди ол. Оннан сонъ йыйылганлар алдында муниципалитет аькимбасы Аким Микиров шыгып соьйледи. – Эндиги яшавшыларымыз, тек ыхтыяр саклав органларынынъ эс каратувын талаплайтаган маьселелерин коьтерип калмай, туратаган еринде оьз ыхтыярлары бойынша маслагатласпага да амаллары болаяклар. А участковый уполномоченныйына сол зат гражданлардынъ ыхтыярларын коршалавга каратылган ис аьрекетин сапатлы толтырмага да амал береек, – деди ол. Оннан баска Аким Микиров курылыста ортакшылык эткен авыл администрациясына, иш ислер органларына эм Кизляр каласындагы коньяк заводынынъ бас етекшиси Евгений Дружининге оьз разылыгын билдирди. Солай болып, авыл яшавшылары атыннан Крайновка авыл яшавшысы Любовь Магомедова да разылык соьзлерин айтып кетти. Оннан сонъ шатлыклы аьлде савгалар тапшырылды. Дагестан Республикасы бойынша Иш ислер министерствосынынъ Разылык хатлары ман район аькимбасы Аким Микиров, Кизляр каласындагы коньяк заводынынъ бас етекшиси Евгений Дружинин, Крайновка авыл администрация аькимбасы Артур Рамазанов, Кизляр районынынъ Депутатлар Йыйынынынъ депутаты Виктор Руднев, баска болып, курувшылар Израил Зайнулабидов эм Шахбан Маллаев белгилендилер. Курылыстынъ барысында белсенли ортакшылык эткен район яшавшылары да Кизляр район аькимбасы атыннан Сый грамоталарына тийисли этилдилер. Кызыл лентады шатлыклы аьлде кескен сонъ, делегация полициядынъ участковый пунктынынъ меканын карап шыктылар. Аьлиги заманга келисте курылган янъы меканда компьютерлик техникасы ман кабинети, кенъесуьв уьшин залы, санузел эм ял алув боьлмелери ярастырылганлар. Эндиги районнынъ алыс болган муьйисинде де ыхтыяр йорыгы канагатланып келеди, эм керексингенлер уьшин ярдам дайым да касында.
Суьвретте: шарадан коьринис.