Район орталыгында – янъы балалар майданы
Янъыларда район орталыгы – Терекли-Мектеб авылынынъ куьнтувар бетиндеги микрорайонында балаларга юбанув уьшин янъы майдан ашылувына багысланып шатлыклы шара озгарылды. Онынъ барысында яркын концерт программасы коьрсетилди: балалар яттан ятлавлар окыдылар, олардынъ йыр йырлав эм усташа биюв оьнерлери де шатлык катнасувшыларын бек сукландырды: олар – ерли мектеблер окувшылары Анжела Сагиндикова, Адриана Лыкова, Милана Дильманбетова, солай ок Рабият Елакаевадынъ етекшилиги астындагы «Юлдызлар» балалар ансамбли. Тувган авылды ярастырувга эм онынъ оьрленуьвине уьлисин косканларга «село ТереклиМектеб» СП МО аькимбасы Марат Кулунчаков авыл яшавшыларына, «Капиталлык курылыс боьлиги» МКУ директоры Джамалдин Акмурзаевке эм Айдемир Карагуловка разылыгын билдирди. Янъы балалар майданын ашылувы ман байланыслы шатлыклы шара «село Терекли-Мектеб» СП МО аькимбасы эм «Ногайский район» МР аькимбасынынъ орынбасары Мурат Шадиев балалар ман бирге кызыл лентады кесуьв мен тамамланды. Терекли-Мектеб авылында янъы ашылган майдан наьсипли балалык, завыклы ойынлар эм балалар куьлкиси занъыраган ери болсын!