Окытувшыдынъ кесписи – энъ маьнели эм сыйлы кеспилердинъ бириси. Янъыларда педагогикалык исининъ ветераны, ийинлеринде 58 йыл бай ис сулыбы болган сыйлы окытувшы Улангерек Аджиманбетовна Динашева оьзининъ 80 йыллык мерекесин кардаш-тувганлары, авылдаслары, ис йолдаслары эм суьйикли окувшылары тоьгерегинде йолыкты. Улангерек Аджиманбетовна – Ногай районынынъ Кумлы авылында сыйлы эм уьйкен яшав йолын оьткен, сав бактысын авылынынъ яс несилин тербиялап келген аьдемлерининъ бириси. Ол – яшав оьмирин тек билимлендируьв тармагы ман байланыстырып калмай, авылдынъ ямагат яшавында да тар катнасып келген белсенли аьрекетшилердинъ бириси. Сыйлы кеспи иеси 1946-ншы йылдынъ кырк кийик айынынъ 2-нши куьнинде Шелков районынынъ Сары-Су авылында согыс эм ис ветераны, кавга йылларында разведчик эм сапер эсабында каты урысларда катнасып, Севастополь, Одесса, Керчь, Новороссийск, Туапсе, Анапа, Геленджик, Сталинград калаларын душпаннан корсалавда эм босатувда ялынлы йолларын оьткен эм согыстан сонъ да бузылган хозяйстводы аякка тургызувда салдарлы коьмегин этип келген Аджиманбет Мунгайтпасович эм куллыксуьер Айшат Амангельдиевна Динашевлердинъ коьпбалалы аьелинде тувган.1954- нши йыл согыс ветераны Аджиманбет Мунгайтпасович Кумлы авылындагы Дмитров атындагы колхозына председатель эсабында йибериледи. Бала шактан окытувшы болаякпан деген асыл мырады кызды, ерли мектебте 8-нши классты тамамлаган сонъ, Хасавюрт каласындагы педагогикалык училищесине аькелди. Окув йылларында училищединъ ямагат яшавында белсенли ортакшылап, туьрли ярысларда, шараларда катнасып келгени эм сол заманларда «Койшы» деген йырын йырлап, баргылы орын иеси де болганы онынъ эсинде, тап буьгуьн болгандай, турады. Педучилищеди тамамлаган сонъ, билимин оьстируьв ниетте, кыз Махачкаладагы пединститутынынъ математика боьлигине заочно туьседи. Динашевлердинъ аьелининъ уьш аьвлетлери Улангерек Аджиманбетовнадан баска, Ису синълиси эм аданасы Янибек те буьгуьнлерде юрек шакырувы ман сайлаган кесписине оьз алаллыгын коьрсетип келедилер. Ис аьрекетин сыйлы окытувшы алыс 1968-нши йылда ога билим ашкышын савкатлаган Кумлы авыл мектебинде баслайды. Эки йыллар баслангыш, оннан сонъ, йогары классларында эсап сабагы бойынша окытувшы, класс етекши эсабында сулыбын байытып, Кумлы авылдынъ коьплеген яс несиллерин яшавдынъ кенъ йолына онълап, ис йолдаслары, авыл яшавшылары арасында сый-абырай казанып келди. Онынъ колында туьрли йылларда билим алган окувшылары эсап сабагы бойынша туьрли дережели олимпиадалар, ярыслар катнасувшысы болып, баргылы орынларына тийисли болып келгенлер. Тек Кумлы авылында тувыл, 1997-нши йыл кеспи иесине Куьнбатар авыл орта мектебинде де окытувшылык аьрекетин каьрлемеге бакты буйырды. Сол йылларда Амзат Алавдинович Межитовтынъ етекшилиги астында окытувшылар ис коллективи куллыгын шынты юреги мен суьйген, кайсы баслаган куллыгын да сонъына дейим еткермесе, яны парахат болмаган, шалыскыр, куллыксуьер окытувшы кыскаяклыды хош коьрип алды. Коьп заман кетпей, ис коллективи сулыплы окытувшыды профсоюз председатели де этип айырды. Сол аьрекетинде де онынъ белсенли катнасувы аркалы кайсы тувган маьселе де заманы ман етимисли шешилип келди. Исинде коьрсеткен етимиси уьшин сол йылларда ол «100-летие Профсоюзу РФ» медалине де тийисли этилген. 2007-нши йылда ясуьйкен окытувшыдынъ минсиз коьп йыллык окытувшылык аьрекетиндеги етискен уьстинлиги «РФ ортак билимлендируьвининъ сыйлы куллыкшысы» деген йогары атына тийисли этилинди. Онынъ 58 йыллар узагында халкынынъ билимлендируьвине багыслаган иси емисин берип келди. Улангерек Аджиманбетовна – туьрли Сый грамоталардынъ, дипломларынынъ, Разылык хатларынынъ иеси. Онынъ колында билим алган окувшылары, выпускниклери буьгуьнлерде туьрли тармакларында етимислер коьрсетип, билим алган мектебининъ атын элимиздинъ кайсы муьйислеринде де, туьрли тармаклар да сайлаган кеспилери бойынша уьстинликли аьрекетлевлери мен коьтерип, окытувшысынынъ салган кыйынын аклап келедилер. Окытувшы оьз окувшылары ман йолыгыса калса, онынъ коьзлеринде, коьнъилинде куваныш йылтыны энип, олардынъ ден савлыгы, исиндеги етимислери мен кызыксынмай бир де оьтпейди. Бу окув йылдынъ басыннан алып сыйлы педагог тийисли тыншаювга кетти. Буьгуьнлерде сав яшав кайратлыгын яс несилди билимлендируьвге аямай багыслап келген шынты окытувшыга онынъ тербияланувшыларынынъ, олардынъ ата-аналарынынъ билдирген разылык соьзлери – йогары савга. Биз де Улангерек Аджиманбетовнады кеспи байрамы ман кутлай келип, берк ден савлык, узак оьмир, яшав онъайлыгын, тоьбеде таза эм ашык коькти йораймыз.

Г.Нурдинова.

 Суьвретте: Улангерек Динашева.