Федор Щукин мен биринши тувра линия
Уьстимиздеги йылдынъ ноябрь айынынъ 25-нши куьнинде Дагестан Республикасынынъ Аькимбасы Федор Щукин тувра линияда соравларга явап береек. Регион етекшисине сизде тынышсызланув тувдыратаган, янынъыз суьйген соравларынъызды VoprosGlaveRD.ru порталында, 8 (8722) 98-90-81 номерли телефон ман кызувлы линиясына тел согып, MAX мессенджеринде чат-бот аркалы бермеге боласыз. Тувра линияды «Дагестан» РГВК телеканалында яде болса, Федор Щукиннинъ «ВКонтакте» социаллык тармагында карамага болаяксыз. Солай ок, «Россия 24», ННТ эм «Прибой-ТВ» каналларында да коьрсетилеек. «Страна Гор», «Радио России», «Ватан», «Диалог FM», «Прибой», «Европа Плюс», «Русское радио» эм «Звезда» радиотрансляция этееклер. – Сыйлы йолдаслар! Мен сизинъ белсенлигинъизди эм регион уьшин ян авырувынъызды коьрип келемен, сонынъ уьшин сизге сенемен. Биз биргелесип коьп маьселелерди шешип келемиз: айтпага, регионымызда табияттынъ авыр ава шартлары ман байланыста республика ерин сув алув баьле-казасы сырагысындагы калдыкларды тайдырув, Дагестаннынъ кала эм авыл ерлеринде маьнели проектлерди яшавга шыгарув эм сондай баскалар. Мен сизден терен маьнели эм салдарлы соравларды куьтемен», – деп язады Федор Щукин эртеректен оьзининъ социаллык тармакларында.