Ногай районынынъ энъ маьнели участогында тезлик шыгув бригада аьрекетшилери куьн сайын бизим йылувлыгымызды, яшавымыздынъ онъайлыгын, электрошырагымызды коршалап эм канагатлап келедилер. Олар, куьндиз яде кеше демей, ава шартларына да карамай, енъиллерден болмаган исин яваплы толтырмага шалысадылар.
Ногай РЭС ис коллективи уьйкен тувыл, болса да, мунда сулыплы эм билимли куллыкшылары каьрлейдилер. Олар оьз ис аьрекетининъ кавыфлыгын
да, маьнелигин де анълайдылар. Олардынъ арасыннан бир аьдемди айырып белгилемеге де бек кыйын. Олардынъ аьр кайсысы да исине яваплылыгы ман, йогары кеспилиги мен баскаланадыдар. Бар олардынъ арасында коьптен аьрекет этип келгенлер де, сол исинде болымлыгын янъыда сынап баслаганлар да, оьзлерин яваплы, нызамлы, йогары кеспили куллыкшылары этип коьрсетпеге шалысадылар.
Янъыларда бизге, редакцияга, Ногай РЭС тармагынынъ тезлик шыгув бригада аьрекетшилерин, айтпага, Янмурза Айнадин увылы Аджиманбетовты эм Амир Ибрагим увылы Шокаевти шакырмага туьсти. Олар тел соккан сонъ, кесек заман ишинде келип, редакциядынъ аьр бир кабинетинде куллык этпейтаган электролампаларын янъыларына авыстырып, оьз ислерин йогары оьлшемде толтырдылар. Кишкей болмаган районымызды электроэнергия ман канагатлав бойынша ис аьрекети енъиллерден тувыл. Онынъ оьз айырым сыры да, сыбыры да бар, онынъ аьрекетшилерине кайбирерде оьзлерин аьдеттеги аьлден тыскары ислеринде сынамага да туьседи.
Янмурза Айнадинович Аджиманбетов яшавшыларды электроэнергия ман канагатлав исине яшавынынъ мине 36 йыллардан артыгын багыслап келеди. Асылы ман ол – Ногай районынынъ Карагас авылыннан. Оьз куллыгын дежурный ис орынында Ногай районынынъ Червленные-Буруны авылынынъ ерли подстанциясында баслаган, оннан сонъ, оьзи тувып-оьскен Карагас авылында каьрлеген. Буьгуьнлерде Терекли-Мектеб авылда сол тармак
бойынша исин етимисли бардырады. 36 ис йыллары ишинде яваплы толтырган ис аьрекети уьшин ведомство, район атыннан туьрли Сый грамоталарына, Разылык хатларга тийисли этилген.
Солай болып, сол Ногай РЭС-тинъ тезлик пен шыгув бригадасынынъ тармагында мине 19 йыллар бойы Амир Ибрагим увылы Шокаев те оьз сулыбын байытып келеди. Амир Ибрагим увылы Ногай районынынъ Куьнбатар авылында тувып-оьскен. Буьгуьнлерде Ногай РЭС-те оператор ис аьрекети бойынша етимисли каьрлеп, кайсы заманда да район яшавшыларын электроэнергия ман канагатлавда уьйкен уьлисин косып келеди.
Биз, «Шоьл тавысы» газетасынынъ ис коллективи, Ногай РЭС етекшисине Рамиль Муслимовка, куллыкшылары Янмурза Аджиманбетовка эм Амир
Шокаевке эткен ярдамы уьшин уьйкен разылыгымызды билдиремиз, оларга берк ден савлыкты, яшав онъайлыгын, керекли эм маьнели ис аьрекетлеринде бийик етимислер йораймыз.
«Шоьл тавысы» республикалык газетасынынъ куллыкшылары.
Суьвретте: Янмурза Аджиманбетов эм Амир Шокаев ис аьрекетинде.
