Халклар ара балаларды коршалав куьни – энъ ярык эм ийги байрамлардынъ бириси.
Сол куьн байрамга багысланып Д.Шихмурзаев атындагы Кумлы авыл орта мектебининъ алдында туьрли туьсли шара уйгынланып озды. Сол байрам завыклы эм куванышлы аьлде оьтип, авылдынъ яс яшавшыларын бирге йыйды.
Шарадынъ шатлыклы кесегин оьз кутлав соьзи мен мектеб етекшиси Сафият Манбетовна Аджигельдиева ашты. Ол балаларды байрам ман кутлап, оларга янъы окув йылы
алдында етимисли язгы тыншаювында куьш йыйнап, толы коьнъил мен мектебке келгенлерин йорады.
Окытувшылар Марина Махачевна Адильгереева, Зульфира Юсуровна Сатырова эм Зарема Явгайтаровна Кутлакаева саьбийлерге кызыклы программасын аьзирлеген эдилер. Балалар уьйкен коьнъил мен йыр йырлап, ятлавлар окып, юмаклар шешип, суьвретлер ясап базластылар.
Мектеб етекшиси эм окытувшылар спонсор эсабында балаларга мороженое эм таьтли зияпетлерин пайладылар. Байрам программасы бойынша уйгынлавшылар сол куьнди аьр бир балага уьйкен коьнъил бермеге, олардынъ эслеринде калдырмага шалыстылар.
Сол байрам куьн саьбийлер уьшин коьптен сакланган язгы тыншаювдынъ ийги баславы болды.
Г.Рамазанова.