Йыл сайын 8-нши сентябрьде аьдет бойынша Дагестан халк шаири Расул Гамзатовтынъ тувган куьнине багысланып «Гамзат куьнлери» оьтедилер. Сол куьн савлай Дагестан Республикасында, сонынъ сырасында Ногай районында да, уллы шаирдинъ яратувшылыгына багысланган шаралар оьтедилер.
Расул Гамзатовтынъ яратувшылыгы – аьвелги мен аьлигидинъ арасындагы коьпир. Онынъ поэзиясы акыйкатлыкты эм ярасыклыкты яшавдынъ аьр бир такыйкасында излейтаган аьдемлер юрегинде яшайды.
«Гамзат куьнлери» акциясы бойынша район орталык китапханасында уллы шаирдинъ яратувшылыгына багысланган «Йырлардан оьзиме эстелик ясадым» деп аталган поэзия саьати оьтти. Шарада Кадрия атындагы мектебининъ 10-ншы класс окувшылары эм олардынъ класс етекшиси Эльмира Аджимуллаева катнастылар. Конаклар эсабында шарага район Хатынкызлар советининъ председатели Асият Манкаева, ДР ат казанган маданият куллыкшысы Сакинат Аблемитова, ногай шаири Джамиля Аманбаева шакырылдылар. Шарада уллы шаирдинъ яшав эм яратувшылык йолы акында айтылды, онынъ оьз халкын, тувган тавларын, суьйим эм хаклар тыпаклыгын данъклаган ятлавларын окувшылар йыйылганлардынъ юреклерине етип окыдылар. Конаклар болса, аьр бир аьдемнинъ яшавында поэзиядынъ маьнеси акында оьз ойлары ман боьлистилер. Йыйылганлардынъ аьр биревининъ коьнъилине еткен шара бизим регионнынъ маданиятын эм поэзиясын терен билмеге даьврендирди. Расул Гамзатов – Дагестаннынъ, тавлардынъ алал эм данъклы увылы. Ол оьзининъ зейинлигин тыныш болмаган яшав бойынша алып барган, уьйкен арыптан аьлемет юрекли аьдем. Онынъ ятлавларын аьдемлер уьйкен суьйим мен окыйдылар. Расул Гамзатов дайым бизи мен.
Нурият Кожаева.
Суьвретте: район китапханасында.