Район бойынша ерли самоуправление органларына депутатларды сайлавлар баьри де 10 муниципаллык образованиелеринде эм баьри де авыл ерлеринде уйгынлы аьлде озганы белгиленген. Баьриси район бойынша сайлавларга 187 кандидат киргистилген эди, олардынъ ишиннен авыл яшавшылары энъ де тийисли дегенлерди депутатка сайлаганлар. Район орталыгы Терекли-Мектеб авылында халк саны коьп болганга коьре, аьли бир неше йыллардан бери сайлавшыларга тавыславга енъил болсын деп уьш сайлав участоклары туьзилген: орталык – Халк яратувшылык уьйинде, экиншиси – А-Х.Джанибеков атындагы орта мектебте эм уьшиншиси Каирбектоьбе сайлав участогы – олимпиада чемпионы Альберт Батыргазиев атындагы спорт мектебининъ
меканында.
Мага ис тапшырмасы бойынша 1172-нши номерли Каирбектоьбе сайлав участогында болмага туьсти. Мунда мен келетаган биринши куьн туьске дейим сайлав участогында тавыслав шарасы парахатлы, шав-шувсыз аьлде оьтип туры эди эм ол, соьйтип те, оннан сонъгы эки куьн ишинде де оьткен.
Сайлав участогынынъ председатели Альмира Махмудовадынъ соьзине коьре, баьри 1513 сайлавшыларды сонынъ 9 агзалары шыдамлы сабыр кепте аьжетсизлегенлер. Мунда сол куьн, сайлав участогынынъ секретари Вера Абдулсаметова билдиргенлей, Ногай район ТИК председатели Зейдулла Аджибайрамов, Ногай район аькимбасынынъ орынбасары Мурат Шадиев, Терекли-Мектеб авылдынъ аьскер гарнизонынынъ аьскершилери тавыслаганлар. Олар ман бирге солай ок оьз яшавында биринши кере сайлавларда У.Алиев атындагы Карашай-Шеркеш патшалык педагогикалык университетининъ студенти Ибрагим Акмурзаев, Ставрополь медициналык институтынынъ студенти Алим Атангулов, Ростов юрист академиясынынъ курсанты Джамал Аджигайтканов эм баскалар катнастылар.
* * *
Эдиге авылынынъ сайлав участогы, аьдетке коьре, авыл орта мектебининъ меканында орынласты. Мунда да уьш куьн узагында авылдагы сайлавшылардынъ хыйлысы келип, оьз гражданлык борышларын белсенли толтырганлар. Мунда 7 депутат мандаты уьшин 12 аьдем оьз кандидатураларын коьрсеткен эдилер.
Энъ бириншилерден болып сайлавлардынъ биринши куьнинде авыл администрациясынынъ аькимбасы Расул Елгишиев тавыслаган эм оьз авылдасларын сайлавларда белсенлик коьрсетпеге шакырган. Соьйтип мунда авылдынъ ясуьйкен, орта эм яс несиллери яваплы ямагат-политикалык шарасында катнаспага амал таптылар. Айтпага, мундагы сайлавларда согыс спецоперациясынынъ катнасувшысы Шахим эм онынъ атасы Енали Джуманбетовлар, тагы бир СВО катнасувшысынынъ анасы Арувхан Исмаилова, яшавында биринши кере тавысын берген Эдиге орта мектебин окып кутарган Изумруд Давлетова эм коьп баска авыл яшавшылары ортакшылык эттилер.
М.Юнусов.
Суьвретте: район сайлавшысы оьз тавысын яслар уьшин береди.