Ногай районымыздынъ Орта-Тоьбе авыл мектебининъ азбарында бу куьн, биринши караска, бек завыклы эм куванышка толган куьн деп айтар эдим, ама мектебти кутараятырган окувшылардынъ куванышларынынъ артында ясырынган туьнъилуьв де бар, неге десе олар бир неше йыллар абытлаган эсиктен сонъгы кере шыгадылар, суьйикли меканга аькелген тар сокпакта олардынъ ызлары энди калмаяк…
Оларды йолга салатаган окытувшылары, олардан сонъ оьсип келетаган окувшылар бу байрам куьнге яхшы аьзирленгенлер: бириншилер – насихат соьзлерин айтып, яхшы йол йорайдылар, экиншилер, туьрли ятлавларды яттан айтып эситтирип, коьнъил коьтерген биювлер бийийдилер.
Байрам. Суьйинишли коьзяслар эм алдыдагы ярык яшавга уьйкен сеним. Мектеб яшавында бу байрам энъ де маьнелилер сырасында деп эсиме келеди.
Авыл мектебинде курал айынынъ сонъгы куьнлеринде уйгынланган занъ байрамы бек ийги аьлде оьтти, мектеб етекшисининъ тербиялав бойынша орынбасары эм оьзи выпускниклердинъ класс етекшиси Сания Нувмеровна Кошановадынъ куьш салувы ман бу куьн шынтысы ман да, сол шарадынъ баьри катнасувшыларынынъ да эсинде калган, эстеликли байрам линейкасы болып оьтти.
Байрамнынъ ийги кесеги деп, выпускниклердинъ биринши окытувшысы Эльбике Абибулла кызы Сагиндиковадынъ насихат соьзи, олардынъ биринши класска келген куьнин эске алувы болды.
Аьли болса, биринши окытувшы оьзининъ оьскен, яшавдынъ кенъ йолына абытлайтаган окувшыларына куванышлы карайды эм аьр кайсысына да «яшавдынъ ашшысын бир
де билмегей эдинъиз» деген
йоравын йорайды… Дериске сонъгы занъды беруьв ыхтыяры мектебти тек «бес» белгилерге битиреяткан 11-нши класс окувшы Джулия Кидирниязовага эм биринши класс окувшылары Амина Насыровага эм Лейла Янакаевага берилди.
Бу занъ биревлерге мектеб йыллардынъ ызы, баскаларга басы экенин коьрсетуьвши белги болады…
Буьгуьн кишкей йолдаслар «Навигаторы детства» деген Савлайроссиялык проекти ишинде мектеб выпускниклерине «Келеектегидинъ самолетын» (кагыттан ясалган, ишине ийги йоравлар да язылган) савгаладылар. Байрам барысында мектебтинъ айырым талаплы, билимли окувшыларын да савгаладылар.
Ногай районымыздынъ билимлендируьв боьлигининъ Сый грамоталары ман авыл мектебинде «Ортатюбе» медиа-орталыгынынъ аьрекетин бардыратаган окувшылар Аиша Сагиндикова, Хадиджа Кокенеева, Амалия Ярболдиева белгилендилер.
Бу кызлардынъ юритетаган аьрекети шынтылай да сондай белгилевге тийисли. ОртаТоьбе авыл мектебинде болган аьдемлер баьриси де олар ман таныс, неге десе конак
болган киси олардынъ соравларына явап бермей, мектебке де кирмейдилер…
Бу кызлар тек ийги билим коьрсетип калмай, мектеб яшавында болатаган кызыклы йолыгыслар, шаралар оьтуьвин социаллык тармакларда кенъ яйылдырадылар. Янъы
технологиялар заманы…
Бу куьн патриотлык тербиялавдынъ маьнели кесеги – патшалык байракларын коьтеруьв эди. Бу куьнги шарада сыйлы конак болган Зейдулла Курман увылы Аджибайрамовка эм энъ де ийги окувшыларга РФ байрагын коьтеруьвге ыхтыяр берилди, ДР патшалык байрагын болса, мектеб пен аьел байланысынынъ белгисин коьрсетип, ата-аналар
ваькиллери коьтердилер.
Сондай шатлыклы аьлде оьтти авыл еринде сонъгы занъ байрамы. Алдыда – патшалык сынавлар. Сол сынавларды тек ийгилик пен, йогары белгилерге оьтинъиз, сыйлы выпускниклер!
Г.Курганова.
Суьвретте: Орта-Тоьбе авыл мектебинде.
