Балалар бавы – аьлемет дуныя. Меним энъ де биринши аьрекетим – балалар бавынынъ тербиялавшысы. Тек балалар ман ислеген аьдем анълайды, саьбийдинъ энъ де таза, сенимли, танъ яны аьдемди оьзи мен байланыслар туьзбеге шакырады. Сеннен наьсипли инсан йок – бала сага оьзининъ кишкенекей аясын тутады эм сенинъ аянъа сеним мен салады. Тербиялавшыдынъ энъ де уьйкен суьйиниши – оьзин саьбийлерге савкатламага, оларды анъламага, олар ман катнасувда куваныш таппага. – Ким айтады, балалыкты кайтарып болмайсынъ деп? Мен куьн сайын саьбийлерге оьз билимимди, суьйимимди савкатлайман. Эм олардынъ коьзлеринде де суьйимди коьремен, соьйтип балалыкты аьр такыйка ман, аьр бир оьзгерис пен сеземен. Балаларга тек окытувшы тувыл, дос болмага шалысаман, олардынъ аьли де яс янларында тоьгеректеги дуныяга ийги каравды, ясуьйкенлерге, йолдасларына, оьзине сый этуьвди тувдыраман, – деп айтады оьз кесписи акында Терекли-Мектеб авылынынъ «Юлдыз» балалар бавынынъ тербиялавшысы Саидат Рашитбек кызы Джумаева. Мине 21 йыл узагында ол оьз юрегин балаларга савкатлап, ислейди. 2001-нши йылда Саидат Джумаева Дагестан патшалык педагогикалык университетин битирип, суьйикли кесписин байырлаган. Ислеген йыллары ишинде ол оьзин терен билимли, йогары кеспили педагог этип коьрсетеди. Ата-аналар эм ис йолдаслары Саидат Рашитбек кызын шыдамлыгы, балаларга суьйими эм оьз кесписине алаллыгы уьшин баалайдылар. Саидат Джумаевадынъ тербияланувшылары буьгуьнлерде оьз бактысын курып, суьйикли кеспилерин байырлаганлар – Изумруд Шавгараева – врач (Ставрополь каласы), Юсуп Аметов, Камалдин Савкатов, Айнара Арикбаева – полиция куллыкшылары, Нурлан Мамутов – фармацевт компаниясынынъ куллыкшысы (Ставрополь каласы) эм коьплеген баскалар. Руслан Айнадин увылы эм Саидат Рашитбек кызы Джумаевлердинъ аьелинде бир увыл эм эки кыз тербияланадылар. Аьелдинъ оьктемлиги – увылы Азиз. Азиз Джумаев 2022- нши йыл Санкт-Петербург каласында Михайловский согыс-артиллериялык Академиясын битирген. Екатеринбург каласында аьзирлик курсларын оьтип, оларды специальли согыс операциясына аькетедилер. Буьгуьнлерде Азиз Руслан увылы Джумаев СВО еринде куллык этеди. Бизим ердесимиз I дережели «За воинскую доблесть», «За боевые отличия», «Участнику специальной военной операции» медальлери мен савгаланган. Мен оьктемлик пен язаман Азиздинъ акында бу соьзлерди, аман юрсин деп тилек саламан. Уьйкен кызы Пятигорск каласында медициналык колледжин битирген, кишкейи мектебте окыйды. Саидат Рашитбек кызы Джумаева «Дагестан Республикасынынъ Билимлендируьв отличниги» деген баргыга тийисли болган. Буьгуьнлерде ол районымызда талаплы эм бажарымлы билимлендируьв куллыкшыларынынъ бириси болады. Тербиялавшыдынъ бас шакырувы: «Балалар бавына келгенде босагада куьлемсирев мен карсы ал саьбийлерди, сен берген билим, суьйим сага бир заман кайтып келер». Сондай ийги исинде уьстинликлери коьп болганын ак юректен сагынаман. Г.Бекмуратова. 

Суьвретте: С.Джумаева.