Россия Федерациясынынъ Журналистлер союзы ман Сочи каласында оьткерилетаган шара савлай элдинъ медиааьрекетшилерин бириктирди деп айтпага
болады. Мунда уьстимиздеги йылдынъ кырк кийик айынынъ 15-нши куьниннен алып 21-нши куьнине дейим йогарыда белгиленген калада форум оьткериледи. Сонда Дагестан Республикасыннан да делегация ортакшылык этти. Аьдет бойынша форумда маьнели орында аьр бир регионнынъ коьрсетуьвпрезентационлык майданы алады. Мунда аьр кайсы ердинъ яшавшысы да медиатармак бойынша етимислерин коьрсетеди. Дагестан да мунда оьзининъ экспозициясын коьрсетип, конакларды республикадынъ мультимедийный эм журналистлик проектлери мен таныстырды.
Дагестан ваькиллерининъ бас темалары Аталыктынъ коршалавшысынынъ йылы эм Махачкаладынъ 168-нши тувган куьни эди. Дагестан Республикасынынъ
майданында сыйлы конак болды РФ Журналистлер союзынынъ председатели Владимир Соловьев. Сол куьн ол регионнынъ маданият асабалыгын эм медийный байлыгын суьлдерлеген материаллары ман танысты. ДР баспа эм информация Агентствосынынъ етекшиси Арсен Юсупов республикадынъ СМИ тармагында яшавга шыгарылатаган проектлер акында айтып, СВО Баьтирлерине багысланып баспаланатаган китаплер презентациясын да оьткерди. Журналистлер союзынынъ региональлик боьлигининъ председатели Магамед Ибрагимов Владимир Соловьевты аьлиги заманларда, Сергей Меликовтынъ баславы ман болып турган, «Доблести гор» деп аталган СВО ветеранларына эм катнасувшыларына уьйретуьв программа модули аьрекет этетаганын билдирди.
Баска болып, форумнынъ биринши куьнинде энъ маьнели оьзгерислердинъ бириси – режиссер Ислам Сатыровтынъ (суьвретте) «Авдарыс» деп аталган, ногай халкынынъ яшавтурмысына багысланган документальли фильмининъ коьрсетилуьви эди. Бу документальли фильмнинъ дагестанлы халкларынынъ бирлик куьнинде коьрсетилуьви де бек уьйкен маьнели эди, неге десе фильмнинъ бас келбетлери ногайлар, олар да дагестанлы халклар санында…