Ногай адабияты ман кызыксынувшылардынъ, ана тилин суьювшилердинъ уьндиригинде тагы да бир янъы китап косылды. Янъыларда Махачкала китап
баспасында ногай шаири, Россия Язувшылар союзынынъ агзасы Явгерет Нурадил кызы Дильманбетовадынъ (Акбердиева) «Мага сайланган кысмет» деген янъы китаби дуныя ярыгын коьрди. Йыйынтыкка автордынъ ана, орыс тиллеринде юрек туьбиннен шыккан ятлавлары, доьртликлери, эсселери, макалалары орын тапканлар. Сол китаптинъ иштелигине «95 йыл Ногай районга – ол уллы мереке», оьнерли шаир М.Кожаевке, оьнерли ногай суьвретши М.Шалиевага (Мусаурова), суьйикли кыймасына, аявлы тетесине, Тансык-кешегине, Раяна унык кызына багысланган, эм сондай баска туьрли темаларга язылган ятлавлар,
терен маьнели доьртликлер, макалалар, оьзининъ студент шагында энген сезимлери акында назмылар эм сондай баска затлар киргенлер. Бу Явгерет Нурадил кызынынъ доьртинши китаби болады. Айтпага, оннан алдын автордынъ Махачкала баспасында 2018-нши йыл «Куьздинъ алтын биюви», 2023- нши йылда онынъ ызлы-ызыннан эки китаплери «Оьмир сесин янъыртып», «Юреклерге ымтылув» деген аты ман дуныя ярыгын коьрдилер. Шаирдинъ макалалары, ятлавлары «Шоьл тавысы», «Ногай давысы» газеталарынынъ, «Байтерек» журналынынъ бетлеринде баспаланып окувшыларга таныс болып келедилер.
Явгерет Дильманбетова язувшылык аьрекетинде, ятлав язувда калемин сынавын мектепте окув шагыннан баслаган эм буьгуьнлерде де педагогика исининъ ветераны сол суьйикли иси мен арымай-талмай каьрлеп, алдыга абытлап, оьз язганы ман окувшыларды да ногай тилинде шыгатаган газеталар, журналлар аркалы  йыйы таныстырып, боьлисип келеди. Автордынъ бу баспадан янъыларда шыккан китаби де ана тилин шынты суьювшилердинъ эсин оьзине
каратып, кызыксындырар деп сенемиз.
Г.Нурдинова.