«Яс аьдемнинъ алдында мынъ кенъ йоллар бар» деген соьз биригуьви бек акыйкат. Ушыны да сол, яс аьдемде, оьзи билимли де болса, онда кайсы тармакты да сайламага, сол йорык пан билимин кенъейтпеге аьлиги заманда амаллар коьп. Мектебти кутармага заман ювыклаганда аьлиги заманнынъ окувшысы оьзи кайдай кеспиди сайлаягын эртеректен биледи, неге десе ол билимлендируьв министерствосы ман беркитилген Ортак патшалык сынавларга аьзирлик коьрмеге керек. Тыныш тувыл, ама онъайлы заманларда яшаймыз – терен билими болып, сол белгиленген сынавларды уьстинликли оьтсе, яны суьйген калада армаганда окувды сайламага яс аьдемнинъ мырсаты да бар.
Терен билимли окувшылар саныннан бизим Давлет Камиль увылы Низамидинов болады. Ол тукымында окытувшылар коьп болган аьелде тувып-оьседи. Уьйкен атайы, акасы, ата-ана яктан тетеси мен энеси эм анасы сол кеспидинъ усталары, айтылган окытувшылар болганлар эм болады. Аьр кайсысы да Давлетке ийги коьрим де болды, оьзлери де билгени мен оны ман боьлисип турганлар. Аьелден басланган яс аьдемнинъ билимге аваслыгы.
Буьгуьнлерде Давлет Камиль увылы Саратов каласындагы В.Разумовский атындагы медициналык йогары окув ошагынынъ терен билимли, ямагат яшавында белсенли студенти болады. Ол оьзининъ терен билимин туьрли олимпиадаларда, шараларда коьрсетеди. Бу окув йылда ол– 4-нши курс студенти. Сол йыллар ишинде Давлет коьп ерлерде оьзин йогары сапатлы билимин эм практикалык аьзирлигин яклаган. Ол йогары медициналык окув ошагынынъ «Проектли офисининъ» активинде, «Яс аьлимлер эм студентлер ямагатынынъ», «СГМУ ОСО тьюторлары» туьзилислерининъ сыраларына кирген. Оьзи окув ошагында аьрекет бардыратаган волонтер исин де етекшилейди.
Давлет Низамидинов 2025-нши йылдан алып Саратовтынъ «Дагестан» деген регионаллык ямагат организациясынынъ грантлы аьрекетининъ эм проектли секторынынъ етекшиси де болады. Солай ок, ол яслар ислери бойынша федеральлик агентстводынъ (кыскаша Росмолодежь) колтыклавы ман «Всероссийский хакатон HealthMind: перегрузка идей» деген проектин яшавга шыгарган. Сонынъ бас ниети – савлык саклав тармагында йогары квалификациялары болган специалистлерди аьзирлев эм мунда расатаган маьселелерди шешуьв уьшин карарлар алув.
Давлет Камиль увылы дайым оьзининъ билимин кенъейтуьв уьстинде аьрекетин бардырады. Ол туьрли олимпиадаларда ортакшылык этуьв, окув ошагынынъ ямагат яшавында белсенли катнасувыннан баска болып, илми куллыклар ман да каьрлейди, уйгынлав аьрекетинде де онынъ етимислери бар. Давлет коьплеген регионаллык, халклар ара оьлшемде конференцияларды йогары дережеде уйгынлап, озгарган.
Ол кайтип сол окув ошактынъ ямагат яшавында белсенли катнасып баслаган экен? Талаплы ногай увыл оьзи социаллык тармакта сол соравга келбаклап, тувра явабын береди. Окувшымды да соны ман таныстырайым, олай болмаса, терен билимли, келеекте айтылган врач болар деп сенемен, яс аьдем мен танысувымыз толы болмас.
– Баьри зат та мен Саратов каласындагы йогары медициналык окув ошагына туьскен заманымнан басланды. Мен биринши курс студенти болып, СтудФестке кирдим, мунда меним сейиримди калдырды университеттинъ белсенли студентлерининъ уйгынлайтаганлары, этетаган ислери. Сол заман ишки сезимлерим козгалып, мырадым оьсти, мен де баска студентлер уьшин бир затлар этпеге ниетим барын анъладым. Мен тек каравшы тувыл, онъайлык туьзуьвши болмага токтастым. Аьлиги заманда мен проектли офисте, ОМУС-та тьютор боламан эм волонтер проектлерин де етекшилеймен, – дейди студент.
Оьктемсигендей яс бизим Давлет Камиль увылы Низамединов. Ол оьзининъ ювыкларын – олар бизим конъысы Тукуй- Мектеб авылынынъ яшавшылары, куьн сайын оьзининъ етимислери мен суьйинтип турады.
Давлет тувган-оьскен, асылы яшаган Тукуй-Мектеб авылынынъ мектебинде тогыз классты окып кутарып, Ставрополь каласындагы СКФУ окув илми орталыгындагы химико-биологиялык классында окып, билим алган эди. Соннан басланган онынъ естественно-научный кепли окув сабакларды терен уьйренуьви. Аьли солар ога берк негиз де береди.
Давлет Низамидинов – ийги студентлер санында эм йогары кепли стипендия алады. Алдыда мен ога тек бийикликти, сайлаган кеспи йолында етимислер, уйгынлав аьрекетти йогары дережеде бардырувды оьскенин йорайман.
Г.Курганова,
РФ Журналистлер союзынынъ агзасы.