Янъы 2026-ншы йылдынъ уьш айы ишинде СВО барысында Россия аьскерлери мен 42 авыл босатылган. Разведчиклер, танкистлер, штурмовиклер алдышылыкта яваплылы эм авыр аьскер борышларды толтырадылар. Аьскерлердинъ алдыга барувында маьнели орынды беспилотниклер операторлары да тутадылар. Олар разведкага, артиллерияга коьмегин этип, оьзлери де душпанга карап атадылар. Дронлар операторлары снайперлардай болып кешеси-куьндизи мен ислейдилер. Соьйтип кешеси-куьндизи мен бизим яс ердесимиз Эльшар Муслимов йолдаслары ман бирге уйкыды койып, оьз дронларынынъ коьмеги мен душпаннынъ БПЛА-ларын йок этеди. Бу йигитлер согыс майданларды йогардан тергейдилер эм оларды савлай куьптинъ «коьзлери» деп атайдылар.
Эльшар Муслимов 2005-нши йылдынъ тамбыз айынынъ 5-нши куьнинде тувган. Терекли-Мектеб авылында онынъ завыклы балалыгы эм мектеб йыллары оьткен. Уллы Аталык согысынынъ катнасувшысы Бийтемир Муслимовичтинъ немереси, согыс оьзгерислер катнасувшысы Альберт Дамировичтинъ увылы оьзининъ уьйкен атайы эм атасындай болып аьскер йолын сайлаган, ол да оьзининъ акында уныкларына ийги атын калдырмага суьйген болар. Онынъ тетеси Курасхан Абуевнадынъ соьзлери мен, Эльшар кишкей заманында атам эм уьйкен атайымдай болып, Тувган Элимди явдан коршалаякпан деп айтатаган болган. Эльшардынъ тетеси 40 йылдан артык заман авыл мектебининъ китапханасында куллык этеди, анасы Солтанат Саитовна – медсестра исин бардырады.
Ставрополь юридический колледжининъ 1-нши курсын окып тамамлаган сонъ, он тогыз ясына янъы толган яс согыс спецоперациясы озып турган ерге йолланады. РФ Коршалав министерствосы ман яс ердесимиз контрактты 2025-нши йылдынъ шилле айында туьзеди. Эл кызыксынувларын коршаламага Эльшар оны ман колледжде окыган осетин миллетли досы ман бирге кетеди, аьлиге дейим олар бирге куллык этедилер.
Эльшар Альбертович уьйренуьвлерди оьтип, БПЛА операторынынъ квалификациясын алган. Яс экзаменлерди тек бес белгилерге берген. Алдышылыкта службасын бардырган биринши айда ок «Фурия» самолетына усаслы душпаннынъ беспилотнигин йок эткен. Эльшар уьш йолдасы ман бирге ислейди, олар куллык эткен ярым йыл ишинде савлай 50 000 аьскершиси болган 58-нши армиядынъ БПЛА-ларды йок этетаган взводынынъ сырасында ислерининъ сырагылары бойынша 1-нши орынга шыкканлар. Яс ердесимиз оьзининъ 3 йолдасы ман йок эткен явдынъ БПЛА-ларынынъ баасы 5 миллионнан алып 25 миллион маьнет акшага дейим етеди. Белгилерге коьре, олардынъ расчеты явга уьйкен – ярты миллиард маьнет акшага ювык йойым келтирген.
Эльшар Муслимов эрклиги эм йигерлиги уьшин Жуков медали мен савгаланган.
Озган йылдынъ декабрь айында бизим яс ердесимиз тыншаювга уьйине келген, ийги службасы уьшин ога 24 тыншаюв куьн берилген. Сол тыншаюв куьнлеринде Эльшарды Ногай районында озган туьрли шараларга баска согыс спецоперация катнасувшылары ман бирге шакырдылар. Айтпага, Кадрия атындагы мектебинде Россия баьтирлер куьнине багысланган шарага, Ногай орманшылыгына йолыгыска эм баскаларга. Шараларда Эльшарга онынъ катнасувшылары оьктемлик пен карадылар. Ол аьли де яп-яс, ама коькирегинде савгалар ярасыкланадылар. Онынъ йигитлиги эм Элине суьйими мектебте окыган окувшыларга – коьрим эм уьлги. Окувшылар алдына шыгып соьйлегенде, Эльшар Енъуьв бизики болар деди.
Савлай Россия элимиз сизди Енъуьв мен келсин деп куьтедилер. Аман-эсен уьйинъизге, ювык аьдемлеринъизге кайтынъыз.
Эльшардынъ аьскер йолы – ол сондай мынълаган оьз эрки мен Элининъ кызыксынувларын, бойсынмаслыгын, оларга баалы затларды коршаламага турган яслардынъ йолына усаслы. Сондай йигитлер элимизде болган шаклы, бизге бир яв да коркынышлы тувыл. Енъуьв бизики болар!
Нурият Кожаева.
Суьвретте: Э.Муслимов.
