2026-ншы йыл Россия Халкларынынъ Бирлик йылы деп беркитилген. Бу йылдынъ бас мырады – коьпмиллетли Россиядынъ еринде яшайтаган халкларынынъ арасындагы дослыкты, анъламлыкты, бирликти берк этуьв. Быйылдан алып календарьде эки маьнели куьн белгиленеек: коькек айынынъ 30-ншы куьнинде Россиядынъ аз санлы тамырлы халкларынынъ куьни эм кырк кийик айынынъ 8-нши куьнинде – Россия халкларынынъ тиллерининъ куьни. Бизим элимиз бурынгыдан алып коьпмиллетли эм конфессиялар патшалыгы болады.

Россия Халкларынынъ Бирлик йылына багысланып, районымыздынъ китапханаларында шаралар оьткериледи. Соьйтип, янъыларда Терекли-Мектеб орта китапханасында «Россия тавысы – бирлик тавысы» деп аталып, шаирлик конкурсы озды. Бу шара Савдуныялык шаирлик куьнин де белгилеп, поэзия суьювшилерди, окытувшыларды эм катнасувшыларды йыйнады. Каравшылар яс талапларды коьтергишлев ниет пен келдилер.
Конкурста районнынъ 3 мектеблериннен 10 окувшылар катнастылар. Олар яттан Аталыктынъ, халклар ара дослыктынъ акында ятлавлар окыдылар. Аьр бир катнасувшы сертификатлар алдылар, енъуьвшилер I, II, III дережели димломларга тийисли болдылар. Ийги окыганларга китаплер савгаландылар.
Биринши орынга А-Х.Джанибеков атындагы мектебтинъ окувшысы Мадина Курганова, экинши орынга – Кадрия атындагы мектебтинъ окувшысы Асхад Манкаев тийисли болдылар, уьшинши орынды А.Асанов атындагы мектебтинъ окувшысы Малика Эльгайтарова эм Кадрия атындагы мектебтинъ окувшысы Милана Мусаева боьлистилер.
Баьри енъуьвшилерди де уьстинликлери мен ак юректен кутлаймыз. Оларды аьзирлеген окытувшыларга савбол айтып, ана тилине суьйимди балалардынъ юреклерине эндиргенлери уьшин разылыгымызды билдиремиз.
Г.Бекмуратова.
Суьвретте: конкурс катнасувшылары.