Терекли-Мектеб

Халклар ара балаларды коршалав куьни – кишкейлер де, уьйкенлер де суьетаган балалыктынъ яркын байрамы.
Сол куьн Ногай район орталыгы Терекли-Мектеб авылында ава аьллери балаларга шуваклы йылы куьнди савгалаганы ман байланыста авыл паркында эм орталык стадионында бир неше байрам шаралары болып оьттилер. Патшалык ногай халк саз алатлар оркестрининъ меканы алдындагы майданда ногай драма театрынынъ актерлары белгили орыс халк эртегилери бойынша уьйкен ыспайы сцена куллыгын коьрсеттилер. Мунда йыйылган балалар эм ата-аналар алдында орыс халк фольклорининъ суьйикли персонажлары эртегилер элиннен бизим яшавга келдилер. Олар соны ман бирге балалар ман да тар аьллесип, олар уьшин кызыклы ойынлар эм ярыслар озгардылар.

Авылдынъ янъы волейбол майданында районнынъ балалар мектеб командалары йолыгыстылар. Кызлар бу ойынларды мектеблер ара шынты спорт дослыгына айландырдылар.
Шора-баьтир атындагы орталык стадионында болса, Карагас авылдынъ эм район орталыгынынъ Победа микрорайонынынъ балалар командалары футбол бойынша ярыс озгардылар. Каныгыслы эм кызыклы ойыннынъ сырагысында спорт наьсиби Карагас авылдынъ кеделерине буйырды эм олар куьндеслерин 2:1 эсап пан енъдилер.
Байрам куьни солай ок Халк яратувшылык орталыгы алдында орынласкан балалар аттракционында, район
паркында балалардынъ ойынлары эм кыдырувлары ман тамамланды.

Бизим хабаршы.