Ногай районымыздынъ Куьнбатар авыл еринде орынласкан А.Зекашев атындагы ипподромында, Россия Халкларынынъ бирлик йылына багысланган атшабыс болып озды. Ногайдынъ байыр спорт ойыны болган атшабыс аьвелгиде кайсы эр кисиди де аьвликтирген эм кызыксындырган. Бир кесек заманларга атшабыс мутылып та баратаган аьвлигуьвлер санына да кирип баслаган эди, ама кан ман янга кирген аьрекет тамырыннан юлкыланып, алынып тасланмады. Ызгы заманларда коьплеген аьдемлер ат та саклайды эм оьзлери сонынъ уьстине минип, ел етпес ойыны ман аьвлигедилер. Дуныя юзинде алдышылыкты алган атшылар да бар. Ногай районымыздынъ Куьнбатар авылында оьткен атшабыс Россия Федерациясынынъ ети регионыннан эм Казахстаннан бу спорт кеби мен аьвликкенлерди йыйды. Россия Халкларынынъ бирлик йылына багысланган шарада коьп аьдем ортакшылык эттилер, мунда яс баладан алып ясуьйкенге дейим де бар эди. Атшабыста конак болган аьдемлердинъ коьбисининъ коьзлеринде сукланув эм сейирсинуьв бар эди. Бу куьнги шарады «село Кунбатар» СП МО администрациясы эм «Спорттынъ миллет кеби эм ат-спорт индустрия оьрленуьвининъ орталыгы» АНО уйгынлаганлар. Спонсорлык колтыклавды «Таймыр-Инвест» ООО, «АС-Логистик Центр», Куьнбатар авыл яшавшылары эткенлер. Мундай шарадынъ уйгынланып эм бек ийги аьлде озгарылувы – Ногай районымыздынъ потенциалынынъ оьсуьвин эм Дагестан Республикасынынъ сыртында оьзгерисли туризмнинъ эм ат спорттынъ оьрленуьвине майдан барын коьрсетти. А.Зекашев атындагы ипподром куьнненкуьнге оьрленип, Россиядынъ эм ювыктагы шет эллерден атлары бар аьдемлерди, спортсменлерди эм атшабыс спорт кебин суьювшилерди де йыйнап баслаган. Ипподром кенълиги заьлимдей ер болады. Атлар шабатаган майдан дережели кепли, сондай оьзгерисли ойынларды озгарувга баьри тийисли шартлар да туьзилгенлер, аьдемлерге де базласларды олтырып карамага онъайлыклар да бар, каравшылар алдында майданнынъ аргы ягында болатаганын да коьрмеге амал бар, коьз алдында уьйкен экран турады. Ат сакламага да амаллар бар, кырдан конак болып келген атларга да конак уьй де бар. Ипподром каралдысы да ярасыклы ярастырылган, туьрли кепли тереклер, коьл де этилген. Мундагы инфраструктуралык оьрленуьв тек атшабыслар оьткермеге тувыл, авыл хозяйстволык ярмаркалар уйгынлап озгармага да амал береди. Атшабыс, бурынгы заманларда ат минмеген, ат шаптырмаган ногай болмаган. Бу куьн Куьнбатар авыл еринде болган атшабыстай оьзгерислер халкымыздынъ оьмирлер арттан келген ийги аьдетлерининъ бирисин саклавга коьп амаллар береди.

  Г.Курганова.