Бу куьнлерде бизим коьп ердеслеримиз Элимиздинъ туьрли муьйислеринде, сонынъ сырасында сырт яктагы калаларда да, куллык этип, уьстинликлерге етиседилер. Сол якларда ислеген ногай окытувшылар, медицина куллыкшылары эм баска туьрли кеспи иелери акында биз суьйинишли хабарлар эситип турамыз.
«Кожаный мяч – Школьная футбольная лига» Савлайроссиялык базласлардынъ 4-нши кезегинде янъыларда бизге тагы да бир ийги хабар келди. Ямал-Ненец эм Ханты-Мансийский автономлы округларынынъ Янъы Уренгой каласында эм Федоровский районында куллык эткен ердеслеримиз Эмре Елакаев эм Бегали Койлакаевтинъ окувшылары – 2-нши орынды, Хамза Эсболгановтынъ окувшылары – 1-нши орынды бийлегенлер. Бу базласлар янъыларда Тюмень каласында футболист эм тренер Никита Симоняннынъ эстелигине багысланып уйгынландылар. Мунда Урал федераллык округынынъ эм Куьнбатар Сибирьдинъ, солай ок Башкортостан, Челябинск, Екатеринбург, Омск, Тюмень, Пермь калаларыннан куьш-куватлы деген командалар катнастылар. Бизим ердеслеримиздинъ окувшылары йогары оьлшемдеги аьзирленуьвди коьрсетип, алдышы орынларды алдылар. Эндиги олар Нижний Новгородта оьтеек Савлайроссиялык бириншилигининъ финалында Урал федераллык округын ваькиллееклер.
Эмре Елакаев Янъы Уренгой каласындагы «Перспектива» деп аталган мектебинде эки йылдан бери физкультура окытувшысы болып куллык этеди. Ол мунда мини-футбол, шахматлар, волейбол, «настольный теннис» бойынша кружокларын юритеди, тренажер залында заведующий исин де бардырады. Онынъ окувшылары туьрли базласларда ортакшылык этедилер эм савгалы орынларды бийлейдилер. Бу окув йылдынъ ишинде олар «Кубок интеллект академии» шахматлар бойынша Савлайроссиялык ашык турниринде ортакшылап, ийги ойынлар коьрсеткенлер. «Час клуба» шахматлар бойынша Ашык кала бириншилигинде Янъы Уренгой каласынынъ билимлендируьв учреждениелери сырасында ердесимиз куллык эткен мектеб балалары 1-нши орынды казанганлар. Тезден олар «Ак ладья» шахматлар бойынша Савлайроссиялык турниринде оьз куьшлерин сына- яклар. Солай болып Янъы Уренгой каласында оьткен футбол бойынша базласларда Эмре Муратовичтинъ окувшылары аьр дайым да 1-2-нши орынларды бийлейдилер. Окытувшы кызларды да футбол ойынына уьйретеди, соьйтип кызлардан туьзилген команда калада – 1-нши орынды, регионда 2-нши орынды казанган. Сол сырагыларга олар эки ай ишинде еткенлер.
Эмре Муратович Ногай районынынъ Терекли-Мектеб авылында тувып-оьскен. Оны спорт аьр дайым да кызыксындырган, бала заманында да, мектебте ислеген йылларда да ол Ногай район командасынынъ сырасында туьрли калаларда оьткен футбол, волейбол бойынша базласларда катнаскан. 2020-ншы йылда Махачкалада оьткен футбол бойынша чемпионатында ортакшылап, команда капитаны эсабында ойнаган.
Эмре Елакаев Саратов каласындагы патшалык университетинде билим алган сонъ, ис аьрекетин Таьтли-Булак авылында баслаган. Сонъ А-Х.Джанибеков атындагы мектебинде ислеген. Мунда ол теннис, мини-футбол бойынша кружоклар юриткен. Онынъ окувшысы Каримулла Яриков теннис бойынша туьрли республикалык конкурсларда катнаскан, солай ок СКФО -да Дагестан йыйылма командасынынъ сырасында 1-нши орынды казанган.
Ердесимиз окытувшылык исине оьзин 23 йылдан бери багыслап келеди. Онынъ ийги иси «Дагестан Республикасынынъ ат казанган окытувшысы» деген атка тийисли болувы ман белгиленген. Эмре Елакаев Янъы Уренгой каласында аьрекетлесе де, Ногай районында балаларга спорт пан каьр шекпеге онъайлы аьллер туьзилуьв акында ойланады. Ол Терекли-Мектеб авылында балаларга бассейн салынса экен деген ойы ман боьлиседи, ялдав балалардынъ ден савлыгына, оьрленуьвине пайдасы уьйкен экенин белгилейди.
Н.Кожаева.
Суьвретте: Э.Елакаев (биринши), Б.Койлакаев эм Х.Эсболганов.
