Тереклер – авадынъ «оьпкелери» деп, босына айтпайдылар. Акыйкатлыгы да бар, не шаклы оьсимлик тоьгерегимизде коьп болса, сол шаклы да аьдемге енъил тыныс алынады. Авадынъ тазалыгы да соны ман байланыслы болады. Шоьллигимизде яй шагында айлак исси болатаганы ясыртын тувыл, бизим еримизге не шаклы тереклер коьп болган шаклы, бизге зарар болмайды. Ногай районымыздынъ тарихин актарып карайтаган болсак, бизим якларда биринши тереклер олтыртып, оьзлерининъ ийги атын калдырганлар арасында Филипп Капельгородскийди айтпага боламыз. Ол олтырткан тереклер буьгуьнлерге дейим де оьз салкынлыгын берип турады. Оьмирлер оьткен болса да, сол заманлардан, онынъ эткени мутылмайды эм мутылмаяк… Табиаттынъ коьркленуьви, ясылланувы уьстинде куллык этип келетаган аьрекетшилер бу куьнлерде де бар. Олар да оьз ерлерининъ коьрки акында ойлайдылар. Тезден – бу тармакта ис аьрекет бардыратаганлар байрамы. Кырк кийик айынынъ уьшинши каты куьнинде орманлык хозяйствосында ислейтаган куллыкшылар аьдетке кирген кеспи куьнин белгилейдилер. Сол куьн ийги куллыкшылар сыйоьрметлевге тийисли боладылар: биревлердинъ этетаганы – Сый грамота ман, баскадыкы – йогары дережеси болган белги мен… Меним буьгуьнги ниетим – орман хозяйствосында коьп йыллар ийги ис аьрекетти бардырып келетаган Динара Солтанбек кызы Адильханова акында язып, газета окувшысын оны ман таныстырув. Динара Солтанбек кызы ДР-нынъ «Ногайское лесничество» ГКУ тармагында ислейтаганы эки онйыллыкка ювык заман болады. Ол мунда баслап бухгалтерделопроизводитель болып иследи, оннан сонъ ога яваплы ис орыны – орманды коршалав бойынша патшалык инспекторы борышын толтырув тапшырылды. Ол оьзине тапшырылган ис орында уьйкен яваплылык пан куллыгын юритеди. Йылдан-йылга ис сулыбы да байыган. ДР-нынъ «Ногайское лесничество» ГКУ етекшиси Феруза Дикиновадынъ белгилеви мен, Динара оьз билимин оьстируьв уьстинде ислеп турады, Ногай районымыздынъ яшавшылары арасында орманлыкты саклав кереги акында хабарласувларын юритеди. – Динара Солтанбек кызынынъ уйгынлав аьрекет юритуьвин бек яратаман эм онынъ сол оьнери мен сукланаман деп айтпага да боламан. Ол орманлыктынъ бизге кайдай пайдасы эм соны коршалав бойынша ислерди кайтип юритпеге керегин мектеблерде, яшавшылар араларында бек анъламлы эм келбаклап айтып, оларга еткерип болады. Ол неше кере де оьзининъ сол тема бойынша язылган макалаларын туьрли социаллык тармакларда эм «Шоьл тавысы» республикалык газета бетлеринде баспага аьзирлеп берген. Туьрли йылларда онынъ маслагаты ман мектеблерде киши орманлыклар олтыртылганлар, – дейди ол ислейтаган орманлык хозяйствосынынъ сулыплы етекшиси Феруза Курманали кызы. Ис йолдаслары арасында Динара Адильханова сый ман пайдаланады. Ол – ийги йолдас, белсенли куллыкшы, сыйлы хатын, суьйикли ана. Аьелде уьш балага яшав оьмирин берип, олардынъ уьстинликлерине суьйинип яшавды бардырады. Кеспи байрам алдында куллыкшыга не йорамага болады, оьзек те, исинде уьстинликлер, таза аспан астындагы тынышлы яшавды, аьелде тек йылувлыкты, ошак оты бир де соьнмесин… Г.Курганова, РФ Журналистлер Союзынынъ агзасы.

 Суьвретте: Динара Адильханова.