Бу куьнлерде Москвада «Россия» Миллет орталыгында «Малая Родина – сила России» деп, III Савлайроссиялык муниципаллык форум оьтеди. Онда Ногай
район делегациясы да ортакшылык этеди: район аькимбасы Джамалутдин Эсиргепов эм уьш авыллар аькимбаслары – Марат Кулунчаков (Терекли-Мектеб), Амир Арунов (Карасу), Замид Яриков (Куьнбатар).
Уьшинши кере оьткерилетаган бу уьйкен оьлшемли оьзгерис 7000 катнасувшыларды бирлестирди – муниципалитетлер, региональлик эм федераллык власть органлар ваькиллерин, солай ок шет эллер конакларын.
Форумда ортага салынып ойласылатаган бас темалар ерли самоуправление оьрленуьви мен байланыслы, айтпага, яшав сапатлыгын арттырув, муниципаллык аьрекетине цифровой технологияды киритуьв, ерли баславларды колтыклав эм регионлар ара уьстинликли сулып пан боьлисуьв.
«Форумда ортакшылык этуьв бизге ийги практикаларды, ийги сулыпты коьрмеге эм федераллык орталыгына бизим авыллар уьшин актуальли соравларды еткермеге эп береди. Биз Ногай районында яшавды оннан да онъайлы этуьв уьшин оьз ой-токтасларымыз бан боьлиспеге эм ис йолдаслардан уьйренмеге аьзирмиз», – деди Джамалутдин Эсиргепов, форумда катнасувдынъ маьнелигин белгилеп.
Делегатлар тийисли секцияларда, тоьгерек столларда эм элимиздинъ ийги муниципаллык проектлерининъ презентацияларында ортакшыламага планлайдылар.