Бала заманнан алып ясав ман кызыксынатаган саьбийлерге сукланаман, оьзимде сондай оьнер, оькинишке, йок. Кагытта тоьгеректеги коьринислерди коьрсетип болган талап аьлемет деп эсиме келеди. Сондай усталыкты кишкей балаларда оьрлендиретаган окытувшылардынъ бириси – белгили суьвретшимиз, Россия Художниклер союзынынъ агзасы Мархаба Аджибаьтир кызы Шалиева. Онынъ Кадрия атындагы окувшылары эм Сраждин Батыров атындагы тербияланувшылары туьрли конкурсларда катнасып, оьз оьнерин коьрсетедилер. Быйыл Халклар ара балалар коршалав куьнине багысланып, Казахстан элинде Алма-Аты каласында яс суьвретшилердинъ «Балалык планетасы: дуныя бояклары» деген халклар ара конкурсы, балалар яратувшылыгынынъ савлайдуныялык фестивали тамбыз айынынъ биринши куьниннен алып шилле айынынъ 15-нши куьнине дейим озды. Проекттинъ етекшиси – Болат Хамзин. Конкурска туьрли техника бойынша (живопись, графика, аралас техника) этилинген ислер алындылар. Туьрли темалар бойынша Мархаба Шалиевадынъ тербияланувшылары суьвретлерин ясадылар: «Дуныя балалар карасы ман», «Наьсипли бала шак». Солай ок балалар тувган ери акында темага суьвретлер йибердилер конкурска. Балалардынъ алдындагы бас борыш темады ашылувы эм боякларды дурыс кулланув эди. Яс суьвретшилер сол борышларды толтырдылар. Соьйтип, Кадрия атындагы мектебининъ 9-ншы классынынъ окувшысы Рашид Акимов эм Сраждин Батыров атындагы саниятлар мектебининъ тербияланувшысы Медина Ахмедова баргылы уьшинши орынды алдылар. Калган катнасувшылар Алина Аджиева, Элина Нургишиева, Нурия Сулейманова эм Фатима Шамбилова дипломларга тийисли болдылар. Савлайдуныялык конкурстынъ катнасувшыларына аьли де коьп енъуьвлер йораймыз. 

Г.Бекмуратова. 

Суьвретте: конкурстынъ катнасувшылары.