Терекли-Мектеб авылынынъ А.Ш.Джанибеков атындагы орта мектебинде «Баьтирдинъ партасы» ашылувына багысланган уьйкен маьнелиги бар оьзгерисли шара болып озды. Бу эстеликли ер Ришад Геннадий увылы Сейтасановтынъ атын юргистеек. Ришад Сейтасанов тек ийги белгилерге Терекли-Мектеб педколледжин окып битирип, савлай яшав оьмирин окытувшы кесписине багыслады. Онынъ яшав йолы эл пайдасына кыйын салув ман бийленген эди: армия, Енъуьв Парадында катнасув, Москвада пожарный болып куллык этуьв. 2022-нши йылынынъ октябрь айында ол Тувган ерин коршалавга турмага токтасты. 2025-нши йылдынъ 23-нши январинде согыс борышын йигитлерше толтырувда ян берди, Йигитлик орденине тийисли этилинген (оьлгеннен сонь).
Ришадтынъ бактысы – ол аьел аьдет-йорыкларынынъ бардырылувы. Ол – Уллы Аталык согысынынъ ветераны, сержантпулеметчик Магомед Алимовтынъ немереси. Эки несил, эки йигитлик, бир Тувган ер.
Шарады бизим юнармеецлер юргистилер. Олар, мунъшылык себепке карамастан, яшав акында айтпага шалыстылар, Ришад аьелде, окувда эм службада кайдай танъ эм мырадына етисуьвге ымтылыслы аьдем болганы акында хабарладылар. Онынъ эстелигининъ сыйына аьдемнинъ ян тоьрин бийлеткен видеоролик коьрсетилди. «Баьтирдинъ
партасы» шарадынъ шатлыклы вакытын онынъ энъ ювык аьдемлери: Ришадтынъ абасы Гульжан Камаева, бизим выпускниктинъ эм СВО катнасувшысынынъ анасы Фарука Ибрагимова, Ришадтынъ биринши йолландырувшысы, педколледжде онынъ кураторы Салима Хасбулатова боьлистилер. Оьз окувшысы акында айта берип, С.Хасбулатова
энъ яркын эскеруьвлерин айтты.
Онынъ белгилеви мен, Ришад айлак танъ эм яваплы аьдем болган. «Ер юзи бир ярасык шешекейин йойытты, ама тоьбедеги таза аспан бир ярык янга байыды», – деди ол, эм бу соьзлер энъ ак юреклик аманласув эсабында эситилди. Биринши болып  партага баьтирдинъ акасынынъ увылы – иниси, 9-ншы «г» класс окувшысы Алим Камаев олтырды. Ога карап, анълайсынъ: эс аьелден басланады, анъ-акыл – ювыклардан. Йолыгысты мектеб директорынынъ тербиялав бойынша маслагатшысы Фарида Фейдулла кызы Джумакова уйгынлады. Балаларга каратылган йолландырувшы соьзлери мен тербиялав иси бойынша директордынъ орынбасары Эльмира Тангатар кызы Суюндикова шыгып соьйледи. Борыш эм яваплылык деген тек соьзлер тувыл, ол – аьдемди Аьдем этетаган зат экенин эске салды. Бизге тынышлы аспанды савкатлаганларды биз дайым да эсимизде сакламага тийислимиз.
Йолыгысты, аьр аьдемнинъ юрегине тийип, юнармеецлер «Баьтирлер кетпейдилер. Олар бизди саклавшы малиеклер боладылар» деген соьзлер мен тамамладылар. Балалар, тийисли яшав оьмирин суьрип, кыйынлыклардан коркпаска, олардынъ эткенлери дайымлыкка кеткенлерде оьктемлик тувдырмага болаягы уьшин колдан келген шаклы
мыратларын яшавга шыгармага соьз бердилер.
Ришад Геннадий увылы Сейтасанов атындагы «Баьтирдинъ партасы» бизим мектеб яшавынынъ уьзилгисиз кесеги болар. Ол – тек уьй муьлки эсабында тувыл, а сенинъ сайлавынъ, сенинъ анъ-акыл талабынъ эм эткен ислеринъ – элимиздинъ тарихи дегенди аьр биримиздинъ эсине салув болады.
Д.Аманбаева.