Уьйкен аьел уьйкен кемеге усайды десек, керти болаяк. Ондай кемеди, оьзек те, яшавдынъ толкынында юргистпеге кыйын, а баска ягыннан уьйкен аьел – коьп куваныш, куьез, шыдамлык.
Сондай аьелдинъ бириси Шелков районынынъ Воскресеновский авылында яшайды. Уьйдинъ иеси Арслан Сайду увылы Акбердиев, ол авыл басы да болады. Сабыр, танъ аьдем. Сайдудынъ халк арасында сый-абырайы да бар. Алдынгы заманларда Арслан Сайду увылы полиция сырасында коьп йыллар аьрекет эткен, коьримли иси, талабы уьшин Сый грамоталарга, медальлерге тийисли болган. Косагы Сыйлыхан ман 1996-ншы йылда танысып, аьел туьзген. Сыйлыхан талаплы, сулыплы хатын, сога шайыт авылдынъ ортасында ашылган супермаркет туькени, сол исти уьйининъ касында кишкей сатув ларегиннен баслаган эди. Ол оьзин шынты бизнесмен этип коьрсетип, халк арасында оьз абырайын да коьтерди. Баскалай да, ол –коьримли ана: бес балады тавып, асырав – ол тыныш зат тувыл. Коьп балалы аьелдинъ бириси деп оларды оьктемсип айтпага болады.