Орманларда от туьсуьвлер – аьдемнинъ яшав аьрекетининъ эм тоьгерек яктынъ кавыфсызлыгы ман байланыслы энъ де маьнели маьселелердинъ бириси болады. От туьсуьвлер тек Дагестаннынъ тувыл, савлай элимиздинъ экономикасына эм экологиясына зыян келтиредилер.

Республикамыздынъ орман фондынынъ ерлери 528, 2 мынъ гектар болады, бизим районымыздыкы – 14,173 гектар. «Ногай орманлык» эки участок орманшылыкка боьлинеди: Ногай (6647 га) эм Червленные Буруны (7526 га). Аьр бир участок орманшылыкта бир орманшы эм эки орман инспекторлары ислейдилер. Орманларды оттан саклав– орман хозяйствосынынъ куллыкшыларынынъ бас борышы болады. Орманда туьскен от тек оьсимликлердинъ тувыл, айван дуныясынынъ да явы болады. Орманда туьскен отта тереклер, айванлар, куслар оьледилер. Аьлиги заман орманшылыктынъ куллыкшылары ман яшавшылар ман уьйкен алдын шалув куллыклар юритиледи, айтпага: мектеблерде лекциялар юритиледи, авылларда оттан сакланув керегин коьрсеткен баннерлер илинеди, аьдемлердинъ уьйлерине от туьсуьвден кайтип сакланмага керегин анълаткан кагытлар пайланады.
Алдыда курал айынынъ байрамлары. Яшавшылар аьдетинше куллыктан бос эм байрам куьнлерде табиатка шашлыклар аьзирлемеге шыгадылар. Эсинъизге саламыз, от туьспеге амырак, кавыфлы шагынынъ басланувы ман уьстимиздеги 2021-нши йылдынъ коькек айынынъ 1-нши куьниннен алып орманларда от якпага ярамайды. Он от туьсуьвдинъ тогызы аьдемнинъ куьнасиннен болады. Шуьшлилер административли эм уголовлы яваплыкка тартылаяклар.
Ногай районынынъ баьри яшавшыларына да шакырув этемиз: «Бизим байлыгымыз – орманларды сакланъыз, орманда оттан сак болынъыз».
От туьскенин сезсенъиз, тез арада 8-938-208-33-37, 8-928-219-79-97 номерлерге занъ согып, билдиринъиз.