Россия Федерациясынынъ иш ислер органларынынъ куьни – Аджиевлердинъ аьелинде негизли байрамлардынъ бириси. Аьел басы Темирхан коьп йыллардан бери Ногай районымыздынъ ыхтыяр саклав органларында белсенли аьрекет бардырып келеди. Онынъ акында бизим газетамызда кеспи байрамга багысланган бетлеринде бир неше кере язылган. Ол оьзининъ ийги ис сулыбын бу куьнлерде увылы Юнуска берип келеди. Юнус та, атасындай болып, тапшырылган ис борышын мукаят толтырады. Юнус Темирхан увылы Аджиев (суьвретте) аьдемлер мен катнасувда, аьллесуьвде аьр бир соьзин шегип соьйлейтаган, сый дегенди алды орынга салып исин бардырады. Полиция куллыкшысынынъ аьрекети бек авыр – не шаклы аьдемлер, сол шаклы касиетлер, баьри йолыгатаганлар тилди анълайтаган болып шыкпайды, арада бир «акылятаклар» бир соьзди анълап, баскасын анъламай, давласувга кететаганлар да боладылар. Юнус болса, кайдай аьлден де билимлерин кулланып, тийисли йорыкларды тутып болатаган яс куллыкшы. Алдыда мен ога тек уьстинликлерди йорайман.