Аьр кайсы куллыкты да йогары шандазлыгы ман толтыратаган аьдем дейдилер Азизбек АрсланАлиевич Бекмурзаев (суьвретте) акында ис йолдаслары. Бу куьнлерде ол «Отличник полиции» деген коькирек белгисининъ эм коьплеген разылыклардынъ иеси болады. Ол, Ногай районымыз бойынша МВД боьлигининъ полициясынынъ патруль-пост кызметининъ айырым батальонынынъ мобильли взводынынъ куллыкшысы ис орынында болып, йогары кеспи усталыгын коьрсетип, аьрекетин ийги аьлде бардырады. – Бизим ис аьрекетимиз тыныш тувыл, оьзим сол кеспиди суьйип сайлаганман, сонынъ уьшин тийисли аьлде, йогары дережеде бардырмага шалысаман. Мен аьрекет этетаган боьликтинъ борышлары аьдемлер мен катнаслар бойынша толтырылады. Сонынъ уьшин бизге шыдамлы да болмага керек. Оьзек те, биз ыхтыяр йорыкты тутувды талаплаймыз, гражданлык ямагат яктан соларды бузбага шалысатаганлар да аз тувыл, бу ерде биз эки якка боьлинемиз, аьр ким оьзиндикин коьндирмеге куьш салады, сондай ерде эрислесуьвлер де боладылар, анълатув эм тийисли аьлге аькелуьв, билимди эм аз болмаган шыдамлыкты талаплайды, – дейди яс полиция куллыкшысы.