Доьртинши ноябрьде Россияда бас патшалык байрамларынынъ бириси – Халк бирлигининъ куьни белгиленеди. Бу куьн халкымыздынъ каьмбиллигининъ, элимиздинъ бойсынмаслыгынынъ эм уллылыгынынъ белгиси болады. Байрамга багысланып, Терекли-Мектеб авылында ногай патшалык саз алатлар оркестрининъ меканы алдында шара озды. Онынъ сыйлы конаклары Ногай район аькимбасынынъ орынбасары Мурат Шадиев, Согыс, ис, Савытлы куьшлер эм ыхтыярсаклав органлар советининъ председатели Акманбет Сангишиев, Ямагат палатасынынъ председатели Эльмурза Саитов эм районнынъ баска сыйлы яшавшылары болдылар. Шара Россия гимни мен ашылды. Ногай район администрация аькимбасынынъ кутлавын Мурат Шадиев окып, йыйылганларга эситтирди: «Бу байрам Аталыгымыздынъ тарихининъ маьнели оьзгерислери, несиллердинъ уьзилгисиз байланысы акында эске салады. Бу куьнлерде биз ата-бабаларымыз бан туьзилген Россиядынъ йылязбасын бардырамыз, эм оьз исимиз бен онынъ янъы тарихин туьземиз. Россиядынъ куваты – аьдемлеринде. А россиянлылардынъ куьши – бирликте! Аьлиги аьллерде бу байрамнынъ маьнеси боьтен де артады. Халклар бирлиги мен, оьз элине эм онынъ онъайлы келеектегисине сенуьв мен биз аьр дайым да куватлы болганмыз. Биз кайсы сынавларды да оьтпеге аьзирмиз, биргелесип тыныш болмаган борышларды шешермиз». Байрам программасы ногай патшалык саз алатлар оркестрининъ, «Айланай» фольклорэтнографиялык ансамблининъ зейинли артистлерининъ йырлары ман, «Карлыгаш» эм «Юлдызлар» балалар ансамбльлерининъ катнасувшыларынынъ биювлери мен бардырылды. Халклар бирлигининъ куьнине багысланган байрам концерти, каравшыларга йогары коьнъил савкатлап, юреклерин уллы элимиз уьшин оьктемлик пен толтырды. 

Нурият Кожаева. Суьвретте: концерттен коьринис.